Собир за децата со пречки во развојот – Боки 13: Ќе бидам гласен, доста е од политички будалаштини

Претседателот на Меѓународната асоцијација за човекови и малцински права, Бојан Јовановски, ака Боки 13, презеде нова иницијатива, овој пат за поддршка на лицата со пречки во развојот.

Тој вели дека се одлучил на овој чекор бидејќи тие родители и деца се заглавени во институциските лавиринти, а третманот во институциите кон нив е безобразен. Јовановски укажува на тоа дека е свесен колку им е тешко на тие семејства да ги одгледаат лицата со пречки во развојот затоа што немаат соодветен третман, па по тој повод ги повика граѓаните в четврток, на плоштадот „Македонија“, во 20 часот заедно да покажат дека не излегуваат само на политички будалаштини туку дека сакаат да се дружат и да покажат дека граѓаните се најбитни во ова општество.

„Реков дека ќе бидам гласен, а ќе бидам уште погласен сè додека државата не ги сфати сериозно овие луѓе и додека државата не спроведе сериозна грижа за овие лица. Ги повикувам сите кои се добронамерни и кои  сочувствуваат со тие семејства да ја дадат својата поддршка на еден убав собир во Скопје“, вели Јовановски за „Макфакс“.

Во своето општествено делување, Боки 13 како јавна личност помогна на повеќе семејства кои немаа свој дом, ниту средства за егзистенција. Оваа инцијатива е последна од низата.

„Јас мислам дека ваквите настани треба да нè сплотуваат, а тоа колку нè сплотуваат или колку тоа некој го користи за други цели е друго прашање. За жал, сè е поврзано со политика, но мислам дека граѓаните полека се свестуваат и стануваат сплотени кога станува збор за вакви собири“, додава Бојан Јовановски во својата изјава.

Собирањето потписи за поддршка на децата со пречки во развојот продолжува и денеска во Скопје, Куманово, Велес, Крушево, Струмица, Неготино, Гостивар, Гевгелија и Радовиш./крај/мф/кл