Daily news
Христијан Мицкоски иден лидер на ВМРО-ДПМНЕ?!
Генералниот секретар на ВМРО-ДПМНЕ, Христијан Мицкоски, е човекот за кој во јавноста најмногу се зборува дека ќе биде идниот наследник на Никола Груевски.
Дека Мицкоски е во блиска релација со Груевски, говори и последниот негов потег кога по локалните избори се откажа од советничкото место во Град Скопје со образложение дека целосно ќе се посвети на партиските активности. Инаку, во Советот на Град Скопје опозициската ВМРО-ДПМНЕ изгуби на локалните избори.
„Почитувани браќа и сестри, дозволете ми да ве информирам дека денес се повлекувам од местото советник во Град Скопје. Ми беше чест и задоволство што ја предводев градската листа на ВМРО-ДПМНЕ и коалицијата ‘За подобра Македонија’“, напиша Мицкоски на својот Фејсбук-профил.
Мицкоски е прв од најблиското опкружување на Груевски кој отворено во јавноста проговори кои карактеристики треба да ги има еден партиски лидер доколку Груевски го напушти кормилото на ВМРО-ДПМНЕ.
„Првиот столб е да биде лик што ќе биде прифатен од базата, вториот е да има позитивна перцепција во јавноста и третиот елемент е да биде прифатен од меѓународната заедница. Кој ќе ги исполнува или приближно ќе ги исполни овие три пилари, ќе биде идниот претседател на ВМРО-ДПМНЕ доколку Никола Груевски замине од првата позиција“, изјави Мицкоски.
Медиумите и експертите ова негова изјава ја протолкуваа дека токму тој би бил човекот што би го заменил Груевски.
Мицкоски како студент бил активист на ЛДП
Малку познати факти за пошироката јавност се дека во 1999 година Мицкоски бил кандидат на Либерал-демократската партија за претседател на ССУКМ и жесток противник на тогаш владејачката ВМРО-ДПМНЕ. Ова информација беше изнесена од дел од незадоволните членови на партијата кога во јули тој беше избран за генерален секретар на партијата заедно со новиот Извршен комитет.
Дел од членството тогаш обвини и дека Мицкоски немал членска книшка на ВМРО-ДПМНЕ сè до 2010 година. Во неговата партиска биографија нема информација од кога Мицкоски е член на партијата, но таму стои дека повеќето од партиските активности му се во последните пет години.
Покрај функцијата генерален секретар, Мицкоски е и претседател на кадровата комисија во партијата, а во периодот од 2010 до 2012 бил претседател на Комисијата за енергетика. Бил дел од републичките изборни штабови во 2008, 2011, 2014 и во 2016 година. Во партиското портфолио пишува и дека бил член на конгресот во 2003 година кога Никола Груевски доаѓа на чело на ВМРО-ДПМНЕ, а во исто својство присуствувал и на последниот во мај 2015 година.
За партиска заслуга високоплатена позиција
На функцијата генерален секретар во партијата Мицкоски доаѓа од високоплатена позиција, генерален директор на АД ЕЛЕМ. Во исто време и претседател на Управниот одбор во ЕЛЕМ, а овие функции ги извршува во 2016 година. Подоцна Мицкоски беше назначен за советник на тогашниот технички премиер Емил Димитриев. Претходно, бил вонреден професор на Машинскиот факултет, каде што дипломирал и завршил магистерски и докторски студии.
Неговиот професионален и партиски напредок луѓе блиски до ВМРО-ДПМНЕ го поврзуваа токму за близината со Груевски. Во круговите блиски до сегашното раководство се зборува дека и таткото на Мицкоски бил близок со доскорешниот прв човек на партијата.
Инаку, Мицкоски има 40 години, оженет е и татко на две деца.
Г.Д.М.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.