Daily news
АБА лига: МЗТ го чека Партизан, капитенот Стојановски посакува победа
Вечерва со натпреварите Цедевита-ФМП и МЗТ-Партизан ќе почне новата сезона во регионалното кошаркарско натпреварување, АБА. Изминатите три сезони титулата ја освојуваше Црвена звезда, која и покрај бројните промени во ростерот повторно е најголемиот фаворит за освојување на трофејот. Покрај Црвена звезда, во потесниот круг фаворити за титулата се вбројуваат Цедевита и Будуќност.
Македонски репрезент и оваа сезона ќе биде шампионот од Аеродром, екипата на МЗТ. „Штрковите“ во новата сезона влегуваат со нов тренер, Александар Тодоров се врати во клубот и со целосно изменет тим во однос на претходната сезона, во која дури во финишот МЗТ избори опстанок.
Клубот, кој сезонава работи со намален буџет, се определи во тимот да има најмногу домашни играчи (сите тие се репрезентативни кандидати), а од странците тука е Јуре Лалиќ, кој беше во тимот и во претходната сезона, односно Американците Ерик Гарсија, Даниел Џенсен и Брет Бери.
МЗТ новата сезона ја отвора вечерва од 20 часот во СЦ „Јане Сандански“ против шесткратниот АБА шампион, белградски Партизан.
„Добро работевме во подготвителниот период. Подготвени влегуваме во новата сезона, се надевам дека ќе ја започнеме со победа. Го гледавме Партизан. Знаеме дека е нова екипа, млада, доста трчаат. Ќе мора да ја одбраниме таа нивна транзиција, а во нападот да знаеме каде треба да нападнеме и да бидеме ефикасни“, вели капитенот Дамјан Стојановски, кој остана во МЗТ откако целата претходна сезона ја пропушти поради повреда.
„Очекуваме подобар пласман од минатата сезона. Сите екипи во АБА лигата се засилуваат, сите имаат добри ростери. Лигата е намалена, ќе биде тешко. МЗТ направи реконструкција на тимот, буџетот е скратен, тимот е подмладен, акцентот е ставен на домашните играчи, што мене лично ме радува. Имавме можност да гледаме три нивни натпревари, два во АБА Суперкупот и мечот со Фенербахче. Реално тие се во иста положба како и МЗТ, со намален буџет се, немаат некои изразени ѕвезди. Партизан има млади играчи, кои добро трчаат“, се надоврза на зборовите на капитенот, центарот Бојан Трајковски, кој од оваа сезона е дел од тимот на МЗТ.
Во таборот на МЗТ се надеваат дека оваа од сезона повторно ќе ја имаат поддршката од навивачката група „Фемили Аеродром“, која претходните сезони ќе бојкотираше натпреварите на МЗТ.
Реално има муабети дека оваа сала ќе изгледа онака како што доликува. Се надевам дека „Фелими Аеродром“ ќе дојдат во што е можно поголем број. Се надевам дека ќе се вратат, тие се шести играч“, рече Трајковски.
Покрај Цедевита и ФМП (петок, 18 часот) и МЗТ-Партизан (петок, 20 часот), во првото коло ќе играат: Будуќност-Задар (сабота, 21 часот), Мега Бемакс-Цибона (недела, 19 часот), Црвена звезда-Морнар (21 часот) и Олимпија-Игокеа (понеделник, 21 часот).
Инаку од оваа сезона ќе се игра и втората АБА лига, каде преставник на Македонија ќе биде Охрид. Шампионот во АБА 2 ќе избори пласман во најквалитетната регионална конкуренција. Исто така, АБА од оваа сезона ќе организира и јуниорски турнири, на кои ќе учествуваат десет екипи.
Ненад Цветанов
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.