Daily news
Австрија гласа: Курц се надева на пресметка со крајната десница
Во Австрија денеска се отворени избирачките места на парламентарните избори на коишто младата конзервативна политичка ѕвезда во подем и досегашен шеф на дипломатијата, Себастијан Курц, се надева дека ќе ја победи крајната десница со острата политика кон бегалците и имигрантите и ветувањата дека ќе спречи повторување на европската бегалска криза.
За 183 места во парламентот ќе се гласа на околу 10.000 гласачки места, од кои 1.492 во Виена. Тие се отворени во неделата во 6 часот наутро по локално време и ќе бидат затворени во 17 часот. Првото гласачко место беше отворено во 5,30 часот на главната станица во Калгенфурт, во сојузната покраина Карантија. Во некои места може да биде продолжено гласањето, според одлуката на Министерството за внатрешни работи, коешто ги спроведува изборите и раководи со работата на Федералната изборна комисија. Првите прелиминарни извештаи се очекуваат набрзо по затворањето на последните избирачки места кога ќе биде познат одѕивот на гласачите.
Австрија се наоѓа пред политичко свртување в десно и крај на долгогодишното владеење на конзервативците и социјалдемократите.
Анкетите пред изборот за Националниот совет (Nationalrat) покажаа дека Австриската национална партија (ÖVP), предводена од 31-годишниот Себастијан Курц, води во испитувањата на јавното мнение со околу 33 отсто. За второто месо се борат Социјалдемократската партија на Австрија (SPÖ) и десничарската Слободарска партија на Австрија (FPÖ), коишто, зависно од анкетите, може да сметаат на поддршка меѓу 23 и 27 отсто од гласачите.
За влегување во австрискиот парламент и минување на изборниот праг од 4 отсто се борат и партијата Зелени, Неос (Либералите) и листата на Петер Пилц, поранешен челник на партијата Зелени.
Последната фаза од предизборната кампања остана во сенката на скандалот околу лажните фејсбук-страници на коишто се правеше обид да се оцрни кандидатот на конзервативците Себастијан Курц. Последните соочувања на социјалдемократскиот и кознервативниот кандидат за канцелар, Кристијан Керн и Себастијан Курц, ги одбележаа меѓусебните обвинувања за водењето валкана предизборна кампања.
Несогласувањето меѓу владејачките социјалдемократи и конзервативците се интензивира по доаѓањето на Керн на чело на социјалдемократите. Подоцна и Курц застана на чело на „народњаците“ и оттогаш меѓу двете коалициски партии владее како на почетокот од годинава, заклучи социјалдемократската државна секретарка, Мунба Дуздар, „вечната борба“ на штета на „конструктивната работа на владата“.
На Себастијан Курц му успеа пролетва со излегувањето од големата коалиција да избори нови избори и да ја обнови партијата креирајќи предизборна кампања којашто би била изразено персонализирана и со тоа успевајќи на партијата да ѝ даде нов подмладен имиџ.
На почетокот од годината неговата Австриска национална партија во анкетите се наоѓаше далеку зад социјалдемократите и десницата. Австриските политиколози, кога станува збор за „феноменот Курц“, зборуваат и за „австрискиот парадокс“ бидејќи Себастијан Курц, иако е веќе со години во политиката и дел од владејачката гарнитура, на гласачите успеа да им се наметне како целосно нов лик.
Себастијан Курц добар дел од својата предизборна кампања ја посвети на прашањето на бегалците, имигрантите и доселениците во целина, особено зборувајќи за намалувањето на социјалните привилегии за странците, со што на „слободарите“ од Социјалдемократската партија на Австрија им ја одзема една од главните политички теми. Курц во кампањата особено се нафрли на детскиот додаток за граѓаните од Европската Унија коишто работат во Австрија, а децата им живеат во земјите на потеклото.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.