Daily news
(Галерија/видео) Автопатите лизгалишта, директорот на „Македонијапат“ задоволен што се проодни
Автопатите во Македонија се завеани. Возачите од речиси сите патни правци низ Македонија се жалат на нерасчистени патишта и лизгави коловози поради што се формираа колони возила. Директорот на јавното претпријатие, Гајур Кадриу, пак, вели дека е задоволен што сите патни правци успеале да овозможат да бидат проодни. За него е нормално при интензивни врнежи да има снег на патиштата.
„На терен се 80 отсто од нашата машинерија и луѓе, а 20 отсто се машинерија на трети лица. Задоволен сум од тоа како нашите екипи се справуваат со снежните наноси. Мора да имеме предвид дека постојано паѓа снег. Во вакви услови, да имаме и нови возила, нема да имаме чист пат. Нормално е да има отежнато движење, но нема застој. Ако нашите екипи не беа на терен, како што се вели, ќе имаше тотална блокада на магистралните патишта. Ноќеска беше до -11 степени, па солта тешко регира. Немаме евиденција колку сол е фрлена, но тоа го правиме во согласност со документите“, вели директорот на „Македонијапат“, Гајур Кадриу.
„Македонијапат“ има склучено договори со 3 фирми во вкупна вредност од 1,7 милион евра“, велат од Центарот за граѓански комуникации, кој направи анализа за начинот на кој се делеле парите за зимско одржување на патиштата. Три договори во вкупна вредност од 1,2 милион евра се склучени со фирмата „НБ-транс компани“ од Тетово, која е задолжена за извршување патни работи во зимски услови во подружниците „Автопат“, „Скопје“ и „Штип“. За извршување на работите на подружницата „Битола“ договорот е склучен со „Јоскатранс-трејд“, Демир Хисар, и тоа во вредност од 326 илјади евра, а за подружницата „Велес“ со ЈА-МИ, Велес, во вредност од 163 илјади евра, се вели во анализата.
„Македонијапат“, заедно со локалните власти, оваа година ќе потроши 5,5 милиони денари за чистење на снегот од патиштата. Чистењето на снегот е поскапо 300 илјади евра во споредба со ланската зимска сезона, а 400 илјади во споредба со сезоната 2015/2016 година.
Поради снежните врнежи, воведена е забрана за движење тешки товарни возила на патните правци Маврово-Дебар, Струга-граничен премин Ќафасан, како и на планинските премини Пресека, Стража и Ѓавато, информира АМСМ.
К. Ландов
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.