Daily news
Али-Пашината џамија ја возбуди охридската јавност: Со право или не!?
Иако подготовките течат од поодамна, откако тешки возила почнаа да минуваат и да ги кршат плочките во старата охридска чаршија, се крена голем прав во јавноста.
Реагираше партијата ВМРО-НП поставувајќи го прашањето за легалноста на постапката, комплетноста на документацијата, мислењето на Советот на месната заедница во Варош и прашањето со некогашната црква Св. Никола.
Официјално најавената конзервација, или реконструкцијата на Али-Пашината џамија, изградена во 1573 година врз остатоци на црква, отвори многу прашања. Али-Пашината џамија има решение за заштита уште од 1968 година. Прогласена е за поединечно заштитено споменичко добро со пропишан режим за заштита. Има и изработен елаборат за конзервација и реставрација на џамијата и решение за нејзино враќање во првобитна состојба, каква што била некогаш.
Имотот е на ИВЗ. Заводот и музеј изврши истражување и конзервација на културното наследство од претходните периоди. Од ИВЗ велат дека имаат уредна дозвола, но, најверојатно, не за сè, така што и од таму треба да ги доразјаснат работите. Имено, граѓаните прашуваат и дали е добиено одобрение од Министерството за транспорт и врски за изградба на овој верски објект кој се наоѓа во центарот на градот, во целина, а за минарето посебно.
Најповиканите за тоа – Заводот и музеј, велат дека носителот на проектот, охридското муфтиство, има одобрение за градба од Министерството за транспорт и врски. За минарето, пак, ќе се правеле дополнителни истражувачки работи и тој проект ќе бил испратен во Институтот за земјотресно инженерство и инженерска сеизмологија ИЗИС во Скопје. Врз основа на нивните анализи, дополнително ќе било поднесено барање до Министерството за транспорт и врски за добивање одобрение за реконструкција на минарето.
Главните реакции се околу висината на минарето. Односно, се зборува дека тоа ќе биде високо 32 метри, а никој не верува дека автентичното минаре, односно биле две минариња, имале толкава височина!? Како и да e, можат да се најдат стари фотографии, да се види како било некогаш. Засега граѓаните се во право со стравувањата дека визурата на чаршијата можеби, ќе се промени, односно наруши.
Барем засега, зад реакциите не може да се види спротивставување од конфесионални причини, но веќе може, уште отсега, да се насети дека на оваа „акција“ е можна и „реакција“, во форма на барање на градскиот плоштад „Св.Климент Охридски“ да се изгради црква бидејќи тука веќе има една приватна капела, но тоа е прашање и одговорност на МПЦ – ОА.
„Ќе се направи реконструкција на минарето, кое постоело, за што постојат и фотографии врз основа на што е изготвен проектот, и ќе го реконструираме минарето онакво какво што било. Ќе се направи комплетна конзервација на објектот и ќе го вратиме во првобитна состојба таков каков што бил некогаш. Проектот е изработен според Законот за заштита на културно наследство и според сите конзерваторски принципи за конзервација на еден објект. Така што тоа што постои некаква фама во јавноста за висината на минарето нема никаква основа бидејќи сето тоа што се прави е сосема легално, законски бидејќи во нашите закони стои дека доколку постојат податоци каков бил објектот кога се изградил има можност за негова реконструкција – вели Паскали Бунташеска.
Како што дообјаснуваат од Завод и музеј, тековно сè уште се прават подготвителните работи, се уриваат несоодветните делови, се вршат конзерваторските активности, некаде наесен ќе почне реконструкција на деловите кои треба да се реконструираат, а до тој период ќе го добиеле одобрението за градење.
Интересен е и еден друг аспект. Во непосредна близина на џамијата се наоѓаат остатоци од стара базилика. Од Заводот и музеј тврдат дека тие воопшто нема да бидат зафатени со градежните активности, а оние, пак, кои се наоѓаат на местото на џамијата ќе бидат соодветно заштитени. На терен е ангажиран конзерваторски и археолошки надзор, кој постојано прави контроли.
Историчарот Гоце Ангеличин Жура вели дека за историјата не е спорно дека тука, на тоа место, постои рано-христијанска базилика, а постои и средновековна црква.
Директорката на НУ „Завод и Музеј“, Паскали Бунташеска, во последната изјава, рече дека е изработен конзерваторски проект, за кој тие имале конзерваторско одобрение, врз основа на кое отпочнле со изведба на конзерваторски работи. На џамијата имало многу несоодветни градби, диво изведени во текот на минатата година, тие се рушат за џамијата, да се врати во автентичнта состојба, каква што била некогаш.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.