Daily news
„Асошиетед прес“: Саудиска чистка во чекор со издигнувањето на крунскиот принц
Неочекувани смени и апсења на десетина министри, членови на кралското семејство, официјални лица и високи офицери во Саудиска Арабија, се без преседан во историјата на ова 85 години старо таинствено кралство, забележува АП. Без преседан засега е и незапирливото доаѓање на власт на 32-годишниот принц, кој само пред три години беше малку забележлив меѓу постарите и поискусни принцови, констатира агенцијата.
Саудиска Арабија, која во 1932 година ја основа кралот Абдулах ибн Сауд, досега имала шест кралеви и сите биле синови на основачот на државата, кој почина во 1953 година. Ниеден од нив не ја презеде власта во богатото со нафта кралство пред да наполни 50 години.
Сегашниот монарх, кралот Салман, имаше 79 години кога пред речиси три години стапи на тронот. Крунскиот принц Мохамед бин Салман (32), чии шокантни чекори во саботата, како што пренесуваат медиумите, укажале на храбриот обид својата моќ да ја консолидира преку мерки на борбата против наводната корупција, би бил прв од својата генерација кој станал крал, со што власта би се префрлила од синовите на основачот на државата, кралот Абдулазиз, на неговите внуци.
Со децении моќта во Саудиска Арабија преминувала од брат на брат, но принцот Мохамед бин Салман би требало престолот да го наследи од својот татко. Тој веќе има положба на министер за одбрана и ги контролира сите аспекти од економијата, планирања, реформи и безбедности во земјата. Неговото доаѓање на тронот, според многу медиуми, било малку извесно. Од април 2015 година тој беше именуван за заменик-крунски принц, односно втор во редот на наследници, што изненади многумина постари и поискусни членови на владиното семејство. Прв во низата наследници на тронот беше принцот Мохамед бин Најеф, искусен член на кралското семејство. Но, кралот Салман го избриша од линијата наследници и му ја одзеде функцијата шеф на советот за борба против тероризам и министер за внатрешни работи.
И покрај обидите да се одлучува со консензус, Саудиска Арабија останува апсолутистичка монархија каде што сите големи одлуки ги донесува кралот.
Апсењето истакнати принцови изгледа го менува начинот на кој кралското семејство пристапува кон внатрешните спорови, но и го привлекува вниманието на крунскиот принц како на храбар реформатор кој е решен да го модернизира конзервативното кралство, на чија почва се наоѓаат најсветите исламски места.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.