Daily news
Баерн во невозможна мисија, Лестер се надева на ново изненадување
Првите полуфиналисти во Лигата на шампионите ќе бидат познати во вторник, по одигрувањето на четвртфиналните реванши помеѓу Реал Мадрид и Баерн Минхен, односно Лестер и Атлетико Мадрид. Во пресрет на реваншите во подобра позиција се мадридските тимови, бидејќи победиј ан апрвите натпревари, Реал во Минхе, а Атлетико на својот „винсенте Калдерон“.
Страстите и емоциите, од првите четвртфинални натпревари во Лигата на шампионите, се уште се свежи, а веќе во вторник на програмата се возвратните дуели на „сантијаго Бернабеу“ во Мадрид и „Кинг Пауер“ во Лестер.
Фудбалска Европа погледот ќе го насочи кон Мадрид на супер дербито помеѓу Реал и Баерн. Актуелниот европски првак е на чекор до пласман во полуфиналето бидејќи во Минхен победи со 2:1.
Баерн е една од најквалитетните европски екипи, но во Мадрид ќе има тешка, речиси невозможна задача. Покрај квалитетниот противник, Баерн против себе ќе ја има и традицијата. Имено, Реал никогаш не испаднал во Лигата на шампионите, откако победил на првиот меч како гостин.
Реал само еднаш во истороијата испуштил предност во реваншот кога бил домаќин. Тоа се случило во 1994 година, во 3.коло во Купот на УЕФА. Тогаш, Реал победил во Данска кај Оденсе со 3:2, но во Мадрид загубил 2:0.
Тренерот на Реал, Зинедин Зидан, има проблеми со составувањето на тимот, бидејќи на дефанзивците Варан и Пепе им се приклучи и Бејл, кој се повреди на првиот натпревар во Минхен.
Проблеми во дефанзивата има и Карло Анчелоти, Хумелс и Боатенг се повредени, а Хави МАртинез е суспендиран.
Надежите на Баерн се зголемија откако лекарите му дадоа „зелено светло“ за настап на полскиот бомбардер, Роберт Левандовски, кој не играше во првиот натпревар.
Во минатото, Левандовски како играч на Борусија Дортмунд, постигна четири гола токму против Реал.
„Нема да се предадеме без борба. Нема да биде лесно, Реал е фаворит, но и ние имаме свој шанси за пласман во полуфиналето“, рекол капитенот на Баварците, Филип Лам.
Инаку Баерн на последните четири гостувања во Шпанија забележа истот толку порази, без да постигне гол, додека на 12-те гостувања на „Сантијаго Бернабеу“ има само две победи.
Англискиот првак Лестер има активен резултат од првиот натпревар во Мадрид, против Атлетико. Лестер загуби 1:0, на прес конференцијата пред натпреварот, тренерот на гостите Диего Симеоне, оценил дека шансите за пласман во полуфиналето се подеднакви.
Неговиот колега, кој го прероди Лестер, Крег Шекспир, знае дека на Атлетико ќе мора да му се спротивстави со офанзивна формација, што не беше случај во Мадрид. На првиот меч Лестер за бранеше со сите фудбалери и за 90 минути не упати удар во рамките на голот на Атлетико.
„Ќе мора да играме отворено, а Атлетико е најопасен кога развива контра или полуконтра. Но во овој момент најважно е дека ние се уште сме „живи“. Знаеме што не чека и што мораме да направиме за да се пласираме во полуфиналето“, порачал Шекспир.
Возвратните четвртфинални натпревари во Мадрид и Лестер ќе започнат во 20:45 часот. крај/мф/нц
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.