Daily news
БЕГ: Околу 45 000 потрошувачи во Скопје активно го користат системот за централно греење
Во пресрет на 22 април – Светски ден на планетата Земја, натамошниот развој на системот за централно греење значително ќе придонесе за намалување на загадувањето во Скопје, информираат во петокот од БЕГ.
„ Околу 45 000 потрошувачи во Скопје кои активно го користат системот за централно греење на БЕГ се греат на еколошки чист начин и со тоа значително придонесуваат за заштита на животната средина.
Експертите се децидни дека целосното искористување на овој систем за греење, покрај намалување на цената на услугата за корисниците, ќе овозможи и значително намалување на проблемот со загадувањето во Скопје, кој е најизразен токму за време на грејната сезона.
На ваков заклучок упатуваат и последните научни истражувања, како што е студијата изработена од Машинскиот факултет во Скопје, со која се потврдуваат анализите според кои користењето нееколошки средства за затоплување на домовите, пред сè дрвата, јагленот, нафтата и други несоодветни горива за урбани средини, се еден од главните причинители за проблемот со енормна загаденост на воздухот во Скопје во зимските месеци“, се вели во соопштението на БЕГ.
По повод годинешното одбележување на 22 април – Светскиот ден на платенета земја, експертите препорачуваат дека земјата треба да го следи трендот на масовен развој на овие системи во градовите на Eвропската Унија со цел да се достигнат целите за намалување на штетните емисии во воздухот и истовремено да се обезбеди оптимален енергетски развој.
„Инаку, во Скопје веќе постои широко распространет и еколошки оптимален систем за централно греење. Како резултат на обемните инвестиции направени во последните 5 години, сите топлани кои ги управува Балкан енерџи груп (БЕГ) како погонско гориво користат исклучиво природен гас, кој е еколошки најчистото фосилно гориво.
Покрај тоа, сите топлани се опремени и со автоматски систем за прибирање технолошки параметри од производниот процес, како и со уреди кои овозможуваат автоматска блокада на работата на котлите при евентуално зголемено ниво на чад.
Топланите во рамки на групацијата БЕГ работат согласно позитивните законски прописи во сегментот на животната средина и поседуваат еколошки дозволи што ги издаваат надлежните институции. Емисиите во воздухот од овие топлани се далеку под законски дозволените гранични вредности утврдени во домашната законска регулатива и ги задоволуваат стандардите.
На таков начин, со употреба на најсовремени технологии во топланите и со постојаната контрола и надзор на технолошките процеси, се гарантира еколошки чисто производство на топлина за централното греење на Градот Скопје,се вели во информацијата на БЕГ.крај/мф/кс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.