Daily news
БЕГ: Сумирани резултатите од грејната сезона 2016/2017
БЕГ (Балкан енерџи груп) ќе ја заврши годинешната грејна сезона со нови 2.300 потрошувачи, од кои речиси половината се потрошувачи кои во минатото се исклучиле од системот.
Ова е дел од информацијата за активностите во грејната сезона 2016-2017 што ја разгледуваше Бордот на директори на БЕГ. Меѓу другото се констатира дека големиот број нови потрошувачи е резултат на повеќе фактори, од кои пресудни се: високиот квалитет и конфорт, проследен со конкурентна цена на централното во споредба со другите начини на греење, понатаму можноста за бесплатно приклучување кон системот, а секако и еколошкиот придонес за градот, со оглед на тоа што ваквиот начин на греење не ја загадува околина.
Раководството на БЕГ одлучи да продолжи со реализација на инвестицискиот циклус за натамошна модернизација и воведување висока технологија во целокупниот систем за централно греење, со што ќе се зголеми неговата ефикасност и атрактивност за потрошувачите и ќе се создадат услови за натамошно зголемување на искористеноста на системот кој има можност да прими и услужи двојно повеќе корисници од сегашните.
На ваков начин, потенцираат од БЕГ, ќе се отвори простор за натамошно намалување на цената за крајните поединечни потрошувачи, затоа што таа во голем дел зависи и од бројот на приклучени корисници.
Натамошната реализација на инвестицискиот циклус означува премин на системот за централно греење од технологија на седумдесеттите години од минатиот век, кон високите модерни технологии базирани на автоматизација, софтверски процеси, нови уреди и материјали.
За следење на процесот на модернизација неопходно ќе биде и раст, како и усовршување на знаењата и вештините на вработените во компаниите на групацијата од чие залагање за напредок и усвојување на новите технологии зависи успехот на модернизацијата.
За таа цел, ќе се спроведе и програма за внатрешно преструктуирање и обука на персоналот согласно новите технолошки барања. Овој процес ќе отвори и можност за ангажман на нов високоедуциран кадар којшто би дал свој придонес кон напредокот и модернизацијата.
Инаку, вкупните вложувања во системот, од 2013 година кога групацијата БЕГ започна да управува со дејноста на централно греење, до денеска, надминаа вредност од 8 милиони евра.
Во делот на производството, воведена е целосна гасификација на топланите, при што елиминирана е емисија на штетни SО2 гасови за 1000 тони во сезона. Направена е и модерницација на електро-енергетските постојки и постројките за подготовка на технолошка вода.
Во тек е инсталирање на систем за целосна автоматизација на топланите. Во делот на дистибутивната мрежа, со замена на дотраените цевководи кои имаа лоша топлинска излолација, со нови и воведување систем за автоматска детекција на дефекти, значително се намалени загубите на вода, а остварено е и намалување на топлинските загуби за 10.000 MWh.
Дополнително, направена е интеграција на поединечните мрежи во една, а во тек е воведување на најсовремен (SCADA) систем за мониторинг и контрола на топлински станици и оформување на модерен диспечерски центар што значително ќе ја зголеми целокупната ефикасност и доверливост на системот.
Паралено, започната е и реализацијата на инвестициската програма на диструбутивниот систем, со замена на два магистрални водови со вкупна должина од 4,5 километри, што е најголем проект од ваков вид во последните 25 години.
Остварени се и значајни вложувања во квалитетот, обемот и достапноста на услугите за потрошувачите. За таа цел, креиран е нов интернет портал кој овозможува брз и ефикасен канал за комуникација со Центарот за грижа на потрошувачи, како и директна пријава на дефекти, течења или рекламации за квалитетот на греењето, увид и плаќање на сметките (фактурите) преку услугата BegEPay, како и информации и совети за поголема енергетска ефикасност, одржување и сервис на внатрешната грејната инсталација и пресметка и споредба на трошоците за греење на иста загревна површина при користење различни начини за греење.
Во наредниот период, групацијата ќе продолжи со вложувања во сите овие сегменти, како и во започнатите проекти за зголемена енергетска ефикасност, како што се: изолирање на вреловодните цевки во подрумските простории и во влезовите на објектите, имплементација на системи за заштеда на електрична енергија во подстаниците на објектите, промовирање на комбинирани бојлери за топла вода и друго, со чија имплементација потрошувачите можат да оставарат дополнителни заштеди. крај/мф/кс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.