Daily news
(Видео) Беса го обвинува Касами за фалсификат и најавува кривична пријава против него
Движењето Беса го обвинува поранешниот лидер Билал Касами за фалсификат и најавува кривична пријава против него. Тие велат дека во наредните денови на неколку прес-конференции ќе го обелоденат „мега-скандалот кој го направил поранешниот претседател на движењето, фалсификувајќи ги документите на Беса во судот и поднесувајќи документи што тој ги напишал дома или кои му ги имаат напишано тие кои го порачале расколот, додека тој ги испратил во судот како тие да се официјални документи на Беса“.
„Истражувавме во досието на Движењето Беса во судот и пронајдовме документи кои ги фалсификувал Касами. Всушност, веднаш по завршувањето на локалните избори, во периодот кога тој го блокираше функционирањето на партијата, односно во периодот кога ние го молевме да најдеме едно компромисно решение, тој веќе почнал со својата задача работејќи скришум. Тој поднел во судот во Скопје фалсификувани имиња за претседатели на ограноците на Движењето БЕСА, со што сакал да создаде фиктивно мнозинство во Централниот совет бидејќи знаел која е реалната поддршка за него“, изјавија од Беса.
Првата седница на тогашниот Централен совет во кој беше изразено незадоволство кон Билал Касами се одржа на 24 декември 2017. Ова седница беше свикана од мнозинството на членовите на Централниот совет со собирање потписи на ден 21 декември 2017 година. Во меѓувреме, Касами на 15 ноември и 4 декември поднел во судот фалсификувани имиња на претседателите на ограноците.
„Се поставува прашањето што го поттикна Билал Касами дури во ноември да ги фалсификува имињата на претседателите на ограноците, кога се знаеше дека во тој период немаше незадоволство изразено кон него? Кој го побарал тоа од него и зошто тој го направил ова фалсификување? На 15 ноември 2017 година тој во судот надлежен за регистарот на политичките партии (предмет бр. 131/17), ги поднел имињата на претседателите не ограноците на Движењето Беса, кои според статутот на Движењето Беса по автоматизам се и членови на Централниот совет, и меѓу 25 имиња ги додал најмалку уште 5 фалсификувани имиња на претседателите на ограноците на Движењето Беса“, обвинуваат од партијата.
Според нив, во Боговиње за претседател на огранокот бил избран Шпенд Тахири, но Касами во судот го поднел името на Нуредин Деари како претседател на овој огранок. „Иако Движењето Беса имаше двајца членови на Централното претседателство од Ресен, Кастриот Реџепи и Аријанит Хоџа, тие не успеаја да најдат ниту десет луѓе за да основат огранок таму. Меѓутоа, ова не му пречело на Касами во судот да го поднесе името на Аријанит Хоџа како фиктивен претседател на огранокот на Ресен. Во Струга избран претседател на огранокот бил Риат Абдурахмани, но како што изгледа, Билал Касами не му верувал, па во судот како претседател на огранокот на Струга го поднел името на Нусрет Зиба, дојден од НДП“, обвинуваат од партијата.
Тие велат дека овие податоци се пријавени и во органите на правдата и тој ќе се соочи со кривична пријава за фалсификување на документите и службените акти на Движењето Беса.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.