Daily news
Брисел подготвува санкции за Унгарија
Ако продолжи демократското назадување на Унгарија Европската унија може да го активира Членот 7 од Европската повелба кој предвидува покренување санкции против земја членка, како одземање на правото на глас и исклучување од заедничкиот пазар. Вакво предупредување дојде од портпаролот на Европските народни партии, Зигфрид Мурезан.
Унгарија се најде под притисок неделава поради усвојувањето на законот со кој се таргетира Централноевропскиот универзитет основан од милијардерот Џорџ Сорос, кој одамна се смета за непријателски бастион на либерализмот од страна на владата на премиерот Виктор Орбан.Со законот практично ќе дојде до негово затворање.
Овој потег испровоцира едногласна надпартиска индигнација во Европскиот парламент, при што претседателот на Европските народни партии, Манфред Вебер, истакна дека слобода на размислување, на истражување и на говор се од суштинско значење за европскиот идентитет.
„ЕПП групата ќе го брани него без оглед на цената што треба да се плати“, порача Вернер.
Иако партијата Фидез на Орбан е дел од групата на народни партии, која е мнозинска во ЕП, европарламентарците побараа започнување дисциплинска постапка против Унгарија и осуда на неговата партија. Според портпаролот Мурезан, партиските лидери од ЕПП групата ќе расправаат околу ситуацијата со Фидез партијата на нивниот состанок на Претседателството на 29 април.
„ЕПП ќе организира темелна внатрешна расправа и ќе ја следи оценката на Европската комисија за законитоста на последниот унгарски закон“, изјави портпаролот на ЕПП, пред да отиде чекор понатаму и да нагласи дека „санкциите против Унгарија се актуелна опција“. „Ако продолжи ваквата ситуација Членот 7 ќе биде ставен на маса“, рече Мурезан.
Членот 7 во круговите во ЕУ и во медиумите се нарекува „нуклеарна опција“ , бидејќи е најдрастичната и најкрајната мерка што може да ја преземе Брисел против земјите членки кои ја доведуваат под знак прашалник демократијата во нивната земја. Досега тој не е употребен ниту еднаш, а за првпат беше споменат во декември лани како реакција на политичките случувања во Полска, која исто така се наоѓа под ваква закана.
Според Мурезан унгарските граѓани треба да бидат прашани дали сакаат да продолжат да уживаат во бенефициите што ги носи членството во ЕУ , вклучувајќи го правото да живеат каде сакаат во Европа, да патуваат и студираат слободно и да ги користат фондовите од милијарди евра на Унијата. Неговата изјава е реакција на лансирањето на т.н. „Да го запреме Брисел“ иницијатива од страна на Орбан , преку прашалници испратени во поштенските сандачиња на унгарските граѓани деновиве со прашања внатре за кои претседателот на Европската комисија, Жан Клод Јункер, оцени дека се пристрасни и само помагаат да се разберат подобро намерите на Орбан.крај/мф/
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.