Daily news
(ВИДЕО) Ванхојте: Среќавам политичари што се однесуваат како деца
Белгискиот експерт Питер Ванхојте се врати во Македонија за да помогне во имплементација на реформите во медиумите. Во интервјуто за „Макфакс“ тој го посочи фиксирањето на буџетот како најголем предизвик за новата влада, покрај политичкото помирување меѓу етничките заедници, но и со ВМРО-ДПМНЕ.
„Ве очекува многу работа. Би ѝ сугерирал на владата да работи полека, да не брза, да оди чекор по чекор, да ги дефинира приоритетите и потоа да направи трасформација. Да направи сè што треба да направи. Мое чувство е дека буџетот во моментов е голем предизвик. Имате многу мал буџет и треба да бидете многу внимателни како го трошите, да го трошите на поефикасен начин и да се справите со долговите од минатото. Исто така, треба да ги дефинирате новите приоритети. Многу важен е економскиот развој, реформите во медиумите, реформите во здравството, во образованието – има толку многу работи со кои треба да се зафатите. Мој совет е – дајте им некое време на властите да се справат со овие проблеми, една до две години, а потоа можете да бидете покритични кон нив. Ве молам почекајте малку ако не остваруваат веднаш, не очекувајте дека оваа влада може да смени сè е за два дена од сега“, порача Ванхојте.
На прашањето зошто лидерот на ВМРО- ДПМНЕ, Никола Груевски, сè уште е добро примен од високите официјални преставници во Брисел, Ванхојте одговори:
„Се сомневам дека е добро примен. Секако, да, од извесни официјални претставници, но од многу други не повеќе. Мислам дека треба да почекаме и да видиме што ќе се случи со можните обвиненија против него и како ќе бидат процесуирани. Моето чувство, според информациите со кои располагам, е дека треба да почекаме судскиот систем да се справи со нив. Тој треба да сноси одговорност како поранешен премиер за сè што направи и како прв човек во претходната влада да им објасни на граѓаните зошто го направи и како го направи тоа“.
Според него, време е да се реинтегрира СЈО во регуларното Јавно обвинителство за да се осигура продолжување на прогонот околу нелегалното прислушкување.Околу шегата кај нас дека неговите мачки го изгребале мерцедесот на нашиот поранешен премиер, Ванхојте даде сериозен одговор:
„ Можам само да кажам дека сум видел многу политичари последните години и некои од нив се однесуваат како вистински деца, предизвикуваат многу штета и се однесуваат на многу неодговорен начин. Се надевам и сигурен сум дека оваа влада ќе се обиде да испорача резултати и ќе се однесува на одговорен и на отчетен начин кон граѓаните. Имате министер за транспарентност и тоа е голем чекор во моментов“.
С. Јовановска
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.