Daily news
Вардар подготвен за Фленсбург
Нешто повеќе од 48 часа остануваат до почетокот на четвртфиналниот реванш во Лигата на шампионите помеѓу ракометарите на Вардар и Фленсбург. Првиот меч, одигран во саботата, Вардар го доби со 26:24, со што направи голем чекор кон пласман на завршниот турнир во Келн. По тој повод, во вторникот, Вардар одржа прес-конференција на која тренерот Раул Гонзалес истакна дека пред неговите ракометари е второто полувреме од пресметката, во кое ќе влезат како резултатот да е 0:0.
Вардар го делат уште 60 минути од остварувањето на целта потцртана пред четири години, пласман на завршниот турнир во Лигата на шампионите. Токму пред четири години „црвено-црните“ беа најблиску до пласман меѓу елитната четворка на европскиот ракомет, но тогаш пред Вардар се исправи токму Фленсбург, успевајќи со поголем број постигнати голови на гостински терен да се избори за пласман на завршниот турнир, а подоцна и да ја освои титулата.
„Ова е второ полувреме од овој четвртфинален дуел. Треба да заборавиме дека имаме два гола предност од првиот меч. Таму одигравме многу добар натпревар, но не треба да заборавиме дека Фленсбург е одличен тим и сигурно е дека нема да се предадат без борба. Беа добри во второто полувреме на првиот натпревар. Предноста е на наша страна, но сега и притисокот кај нас е поголем. Сепак, јас имам доверба во моите играчи, верувам дека ќе одиграме уште еден добар натпревар. Желбата е да играме во Келн“, рече шпанскиот стратег на кормилото на Вардар.
Шпанецот очекува дека Фленсбург ќе промени нешто во својата игра, дека нема да игра како што одигра во својата „Фленс арена“. Предупредува дека германскиот тим и нивниот тренер Љубомир Врањеш ќе се обидат да го наметнат својот брз и агресивен стил на игра.
„Лошо ќе биде доколку помислиме дека два гола е добра предност. Треба да влеземе како да е 0:0. Првиот меч го одигравме добро и во одбраната и во нападот. Голманите беа одлични, но сега можеби нема да имаат свој ден и да биде тоа натпревар со многу голови. Фленсбург е искусен тим, кој игра брз и агресивен ракомет. Ние цела сезона се подготвуваме токму за овој меч“, дополни Вардаровиот тренер.
Реваншот Вардар-Фленсбург ќе се одигра в четврток, од 19 часот, во СЦ „Јане Сандански“. Од клубот информираат дека билетите се распродадени и дека пред арената ќе биде поставен видеобим на кој ќе може да се следи натпреварот. крај/мф/нц
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.