Daily news
Величковски во САД: Ниту една земја не може да се соочи сама со сите безбедносни предизвици
Напорите на Република Македонија во полето на одбраната за полноправно членство во евро-атланските структури, безбедносните предизвици во регионот, како и важноста на поддршката во ова поле која ја овозможува стратегиското партнерство со САД, биле темите што во своето обраќање ги опфатил генерал-потполковникот Методија Величковски, кој во текот на вчерашниот ден во Конгресот на САД заедно со командантот на Националната гарда на Вермонт, генерал-мајор Стивен Креј настапил пред конгресмените од Сојузните Држави на САД: Мичиген, Вермонт, Пенсилванија, Охајо, Индијана и Мисисипи, информираат од Генералштабот на АРМ.
„Покажаната пракса во современото опкружување е дека не постои земја која сама може да се соочи со сите безбедносни предизвици. Затоа, за Република Македонија нема друга алтернатива за евро-атланските интеграции. Од почеток на независноста на Република Македонија, македонското политичко и военото раководство се обединети за визијата која македонската национална безбедност мора да ја гради во рамките на колективната безбедност. Во тој процес постојано инвестиравме, остануваме и ќе бидеме посветени да останеме на овој курс“, истакна генералот во своето обраќање.
Пред претставниците на Конгресот била претставена сегашната реалност во безбедносната сфера во Македонија и земјите од регионот, која е обликувана од заканите кои доаѓаат преку комплексноста на миграциската криза и другите безбедносни предизвици, како тероризмот, криминалот, сајбер опасностите, природните катастрофи и други актуелни безбедносни прашања кои ги пречекоруваат државните граници и се однесуваат на сите земји подеднакво, информираат од ГШ на АРМ.
По обраќањето во текот на средбата со конгресмените се разговарало за позитивните резултати од досегашната долгогодишна соработка на АРМ со вооружените сили на САД, преку партнерската програма за соработка која Македонија ја има со Националната гарда на Вермонт.
Притоа од страна на конгресмените била истакната континуираната поддршка на САД, во зајакнување на одбранбените капацитети и зголемување на борбената готовност со цел постигнување потполна интероперабилност на АРМ со армиите на НАТО земјите членки.
Величковски ги искажал стекнатите бенефити и искуства од заедничкото учество на припадниците на АРМ со колегите од вооружените сили на САД во мировните мисии, и меѓународните воени вежби.
За време на посетата делегацијата на АРМ реализирала и неколку издвоени состаноци со конгресмените на кои се разговарало за потребата од понатамошна поддршка на Македонија и АРМ во остварување на аспирациите за полноправно членство во Алијансата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.