Daily news
(ВИДЕО) Анѓушев: Со планот за економски раст Владата поддржува зголемување на соработката меѓу странските и домашните компании
Владата направи детална анализа на досегашната политика за привлекување на странски инвеститори и констатираше дека оваа политика не ги донесе посакуваните резултати, рече заменик претседателот на Владата, задолжен за економски прашања, Кочо Анѓушев, во неговото обраќање на бизнис форумот на странски инвеститори и домашни компании кои имаат потенцијал да станат нивни добавувачи, во организација на Стопанската комора на Македонија и Советот на странски инвеститори.
Во технолошко индустриските развојни зони функционираат вкупно 19 компании, кои вработуваат околу 20 илјади лица. Според вицепремиерот за поздравување е што околу 20 илјади лица преку вработување во некоја од странсите компании обезбедиле егзистенција, сепак околу 70% од вработените не се нововработени лица, туку преземени од други фирми, а соработката помеѓу домашните и странските компании е на многу ниско ниво и во најголем дел од случаите не преминува 1% од вкупната работа на странските компании.
„Владата го креираше Планот за економски раст, кој набрзо ќе премине и во Владина програма за економски развој, за поддршка на домашни и странски компании, создавање на нови подобро платени работни места, технолошки развој и стимулуриње на извозот. Клучно е што мерките од оваа програма ќе бидат транспарентни, со јасно дефинирани критериуми и важат подеднакво за домашните и странските компании. Важно е да се напомене дека со новите мерки се дава вистинска поддршка за компаниите, а истите ќе продуцираат поинтензивен и одржлив економски раст на земјата“, нагласи потпретседателот Анѓушев.
Вицепремиерот истакна дека Владата ќе биде посветена на привлекување на нови домашни и странски инвеститори, а со планот за економски раст ќе се поддржува и зголемување на соработката помеѓу странските и домашните компании, a не создавање на нелојална конкуренција.
„Со планот за економски раст ќе се стимулираат резултати и раст на компаниите. Ќе се стимулира вработувањето и исплаќање на повисоки плати, Владата директно ќе ги помогне компаниите кои ќе вработат над 80% невработени лица, лица кои излегуваат од образовниот процес, вработени во компании во стечај или ликвидација или превземени вработени од администрација со 20% од исплатена нето плата, доколку исплаќаат плати над 50% од минималната плата дефинирана со закон. Максимално компаниите може да добијат поддршка и до 4.400 евра годишно по вработен, односно ќе се стимулира исплаќање на повисоки плати“, објасни Анѓушев.
Доколку компаниите остварат пораст на приходите во последните 3 години и не го намалуваат бројот на невработени во истиот период, а остварат нова инвестиција, може да очекуваат поврат на инвестицијата од 10%, а доколку се извозно ориентирани, може да очекуваат уште 10% поддршка за трошоците направени за зголемување на извозот. Доколку компаниите извозот го остваруваат во земји од Западен Балкан 6, Владата со дополнителни 10% ќе ги покрие трошоците направени за зголемување на извозот во овие земји.
„Ги стимулираме странските компании да ја зголемат соработката со домашни компании. Доколку странска компанија над 10% од набавките ги извршува од македонски компании, Владата ќе ги поддржи со 1% од вкупно направените набавки“, потенцираше вицепремиерот Анѓушев.
Според анализите направени за 2016 година, вкупно 7000 компании во Република Македонија покажуваат раст на своето произвдоство и не го намалиле бројот на вработени и би можеле да ги искористат мерките од Планот за економски раст
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.