Daily news
(ВИДЕО) Дуковски: Замислете министерка за култура без пасош
Во Апелацискиот суд денеска беше разгледната жалбата на поранешната министерка за култура Елизабета Канческа-Милевска обвинета во предметот „Тендери“, во кој таа и уште две лица се товарат за злоупотреба на службената положба и овластување. Таа си го бара пасошот назад, а СЈО повторно побара притвор за неа.
За ексминистерката и за второобвинетиот во предметот „Тендери“ се бара притвор, а за третообвинетиот само одземање на пасошот.
Канческа-Милевска ја бранат тројца адвокати – Сашо Дуковски, Еленко Миланов и Сања Алексиќ. Судиите кои ќе одлучуваат за жалбите се Лилјана Ивановска-Шопова, Јани Нича и Сафет Кадрии.
Ексминистерката за култура е првоосомничена во случајот за малверзации со тендерот за извршување градежни работи во Музејот на ВМРО, од проектот „Скопје 2014“, со што буџетот, според СЈО, бил оштетен за речиси 54 милиони денари.
Обвинителот Гаврил Бубевски повтори дека СЈО бара притвор за Канческа-Милевска.
„Бараме притвор за обвинетата, само така ќе се обезбеди нејзино присуство. Судот не навел зошто само со тие две мерки ќе се постигне ефекасност на постапката“, рече Бубевски.
Обвинителот побара судиите да ја ценат висината на казната за кривичното дело што ѝ се става на товар, односно затворска казна од минимум 5 години.
Адвокатот Еленко Миланов рече дека судот веќе во октомври одбил мерки на претпазливост. Според него, СЈО не укажа на ниедна околност зошто бара притвор за ексминистерката.
Тој рече дека обвинетата се јавувала на сите покани. Според адвокатот, жалбата на СЈО е ненавремена.
Миланов ги повика судиите да го разгледаат обвинителниот акт и сами да се уверат дека во него нема елементи на кривично дело.
Адвокатот Сашо Дуковски рече дека жалбата на СЈО против решението за неопределување притвор е неоснована. Дуковски се повикуваше на пресуди на ЕСЧП во Стразбур.
Пред судиите рече дека висината на казната не може да е единствена околност за барање определување притвор.
Тој рече дека ексминистерката е угледна личност во државата и дека никогаш не била осудувана.
„Замислете, министерка за култура без пасош“, рече адвокатот во образложението за процесните постапки и додаде дека пасошот на ексминистерката ѝ е потребен за да си ја врши пратеничката функција.
Обвинетата пред судот рече дека е изненадена од барањето за притвор и од одлуката на првостепениот суд за одземање на пасошот.
„Не сум ја попречила постапката. Лично сум ги примала претставниците на специјалното обвинителство. Се јавувам на поканите на СЈО. Не сум сторила кривично дело. Јавната набавка беше спроведена транспарентно“, рече ексминистерката.
Канческа-Милевска рече дека се гордее на македонската култура и уметност. Таа ги достави до судиите сите покани за гостувања од министри и странски делегации.
Рече дека нема двојно државјанство. Канческа-Милевска пред судот рече дека не поседува сметки и имот во други држави.
„Како пратеник ќе продолжам да работам за Македонија и ќе соработувам со судот. Верувам во правниот систем“, рече Канческа-Милевска.
В. Маглешов
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.