Daily news
(ВИДЕО) Заев од Прилеп: Воведуваме општински дебати, градоначалниците отворено и директно ќе комуницираат со граѓаните
Претседателот Заев денеска во Прилеп порача дека, кампањата на СДСМ и коалицијата добива нов модерен стил и формат, на воведување на општински дебати.
„Овде сме во центарот на Прилеп заедно со нашиот кандидат докторот Илија, со кој имаме намера да подискутираме заедно со граѓаните, да дебатираме за важни случувања и да најавиме идна пракса на новиот градоначалник во комуникацијата со граѓаните за прашања што ги тиштат нив и што се важни за нивниот секојдневен живот. Ќе се обратиме овде во една тркалезна околина каде што сите граѓани ќе бидат околу нас. Ќе ги кажеме нашите ставови и нашите впечатоци и после ќе отвориме дебата пред граѓаните да можеме директно да разговараме за сето она што претставува очекување на граѓаните, а секако и перспективи на Прилеп!“ изјави претседателот Заев.
Заев соопшти дека кампањата се одвива во пријателска атмосфера, дека постои голем интерес кај граѓаните за локалните избори од причини што општините се многу важен дел од секојдневието на сите семејствата и граѓаните и рече дека централната власт има намера да продолжи со процесот на децентрализација за општините да добијат поголеми надлежности.
„Размислуваме за здравствените домови да ги децентрализираме, размислуваме и за центрите за социјална работа, и за капиталните проекти од социјалната заштита, за капиталните инвестиции во образованието, така да вниманието кон локалната самоуправа треба да биде се поголемо и поголемо. Се надевам дека граѓаните мудро ќе носат одлуки и конечно Прилеп заслужува промени после толку години заради тоа што само на тој начин ќе ги отвориме важните перспективи за овој важен регион во Република Македонија“ порача претседателот Заев.
Кандидатот за градоначалник на Прилеп, Илија Јовановски рече дека заедно со претседателот на СДСМ и премиер на Република Македонија, Зоран Заев денеска ќе разговараат со граѓаните за иднината на Прилеп, за иднината на младите и на сите граѓани.
„ Мора да ја заокружиме победата од 11 декември, за на 15 октомври сите заедно да ја освоиме и локалната самоуправа за да спроведеме многу проекти, најповеќе за младите. Овде гледам многу млади луѓе, вие сте иднината на нашата држава, вие сте иднината на нашиот град. Ќе направиме многу нешта за младите во нашиот град, младински културен центар, младинско спортски рекреативен центар, младински бизнис инкубатор, згора на тоа младите ќе бидат тие што најмногу ќе учествуваат во носењето на одлуките, креирањето на буџетот, трошењето на парите. Парите ќе се трошат транспарентно, вие сите ќе бидете присутни и ќе бидете информирани.“ изјави кандидатот за градоначалник на Прилеп, Илија Јовановски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.