Daily news
(ВИДЕО) Заев: Поддршката за Темелковски ќе биде уште поголема, промените се здрава работа
„Среќен сум за поддршката што граѓаните на Кисела Вода ја дадоа на СДСМ во првиот круг, промените се здрава работа и затоа убеден сум дека таа поддршка ќе биде уште поголема во вториот круг, што ќе претставува уште поголема обврска за Филип Темелковски, советничката листа и централната власт, да работиме посветено во интерес на сите граѓани“, изјави претседателот на СДСМ, Зоран Заев по денешната отворена дебата со граѓаните на општина Кисела Вода.
Претседателот Заев посочи дека отворените дебати со граѓаните ќе бидат основата на тоа како во иднина ќе функционираат сите општини, бидејќи само со директна комуникација со граѓаните, општините ќе станат подостапни и поотворени, навремено ќе ги согледуваат потребите на граѓаните и ефикасно ќе ги решaваат проблемите.
Одговарaјќи на новинарски прашања, претседателот Заев меѓу другото посочи дека парламентарното мнозинство е стабилно и дека дополнително ќе расте.
„Досега немало отворен состанок, дебата или дилеми дали Алијансата на Албанците излегува од Владата или не. Секако, право на Алијанса е како ќе одлучи, но јас очекувам владината коалиција да опстои и да продолжи да зајакнува во периодот што претстои. Во едно сум убеден, парламентарното мнозинство е стабилно и тоа ќе расте“, истакна Заев.
Во поглед на идната соработка во Собранието помеѓу парламентарното мнозинство и опозицијата, претседателот на СДСМ, Зоран Заев истакна дека очекува дека одреден број на пратеници од опозицијата предводена од ВМРО-ДПМНЕ ќе дадат поддршка на спроведување на реформите.
„Знам дека дел од опозицијата во Парламентот предводена од ВМРО-ДПМНЕ и доста нивни пратеници досега изразиле несогласување на политиките на ВМРО-ДПМНЕ и полека се оградуваат. Јас не претендирам тоа да значи нивно преминување во СДСМ. Не, јас само барам соработка во интерес на граѓаните и државата, која ќе биде утврдена по пат на дебата и верувам дека во иднина ќе имаме добра соработка токму со нив“, рече Заев.
Претседателот Заев во одговор на новинарско прашање истакна дека нелегалното прислушување заврши со формирањето нова Влада и дека правосудството е тоа коешто одлучува за следење на комуникациите.
„Со промена на власта, во Македонија нема веќе незаконско прислушување, посебно не на политички противници. Ако има екстремни структури што се закана за Република Македонија, не зборувам за раководството на ВМРО-ДПМНЕ, верувам дека во тој случај Јавното обвинителство си ја врши работата. Тие ги водат предметите, тие бараат од судовите се што им е потребно. Јас сум надвор и ниту знам, ниту сакам да знам за вакви процеси. Правосудството е надлежно за оваа работа , но знам дека нема никаква политичка заднина, впрочем тие се на заминување и не знам зошто тоа би го правеле“, посочи Заев.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.