Daily news
(Видео) Илиевски стои зад Груевски, но не кажува каде се Јанкулоска и Јанакиески
Лидерот на опозициската партија ВМРО-ДПМНЕ, Никола Груевски, треба да остане на чело на партијата затоа што тоа од него го бара членството, а само СДСМ бара оставка. Според членот на Извршниот комитет на партијата, Богдан Илиевски, сегашниот лидер ја издигнал партијата од пепел. Според него, оние што бараат одговорност од Извршниот комитет праќаат порака до претседателот на ВМРО-ДПМНЕ. Илиевски е сигурен дека Груевски ќе донесе најдобра одлука по огромниот пораз на партијата на локалните избори.
Иако ВМРО-ДПМНЕ не го признава постојното специјално јавно обвинителство и го оценува како неуставно, Илиевски вели дека стојат зад ставот на Груевски за формирање ново што ќе ги истражува изборните нерегуларности. На прашањето зошто формирање ново СЈО ако не го признаваат постојното, Илиевски вели дека за нив била важна формата, а не суштината, затоа што сметаат дека изборите се фалсификат. Богдан Илиевски за „Макфакс“ вели дека изборните нерегуларности се докоментирани со видеоматеријал, кој партијата го поседува.
На прашањето дали, ако имало изборни нарушувања, поткуп, активирање на подземјето и МВР било во служба на СДСМ, е истото тоа што го имаше во објавените прислушувани разговори, тој вели дека криминал е криминал, без разлика кој го прави, треба да ги преземе последиците, додавајќи дека доколку ваков криминал се случувал во минатото, не треба тоа да биде повод да се повторува.
„Во однос на барањето за амнестија за 1.050 лица за разноразни обвиненија, ние бараме ослободување на лицата што беа вклучени во настаните на 27 април бидејќи цврсто верувам дека ниеден не влегол да убива некого или да изврши акт на тероризам“, вели Илиевски додавајќи дека ако се повлече законот, тие ќе ја разгледаат новата ситуација и ќе завземат став.
Богдан Илиевски како член на ИК на ВМРО-ДПМНЕ во однос на иницијаторите за реформи во партијата вели дека има почит за сечие мислење, но не сакаше да зборува за нив велејќи тие да си ја тераат нивната работа, а Извршниот комитет својата.
Илиевски во интервјуто за „Макфакс“ кажа дека во предизборието потенцијални кандидати за градоначалници добивале закани, а некои од нив и се повлекле. Тој се согласува дека се потребни реформи, притоа не укажувајќи што треба да се направи внатре во партијата. За него, изборите биле нерегуларни и се согласува со ставот на Груевски дека тие не треба да бидат признаени бидејќи во текот на процесот имало многу закани кон поедници, притисоци, а како што вели, на некои луѓе им било и забрането да излезат на гласање. Илиевски не кажа дали ВМРО-ДПМНЕ ќе ги врати мандатите што ги доби во 5 општини, но и дали ќе ги повлече советниците од другите, но не ја исклучува оваа можност.
Богдан Илиевски, коментирајќи го прашањето каде е поранешниот член на извршниот комитет на ВМРО-ДПМНЕ и ексминистерот за здравство, Никола Тодоров, вели дека тој не е активен во партијата по инцидентот каде што за малку ќе беше застрелан, сметајќи дека нормално е да тој да се повлече од јавноста по таков настан. Илиевски одби да коментира каде се другите поранешни челници на партијата, како Гордана Јанкулоска, Зоран Ставревски, Миле Јанакиески. Тој потенцира дека штом ВМРО-ДПМНЕ ќе ги заврши анализите, ќе одлучи како ќе дејствува во понатамошниот период.
Кристијан Ландов
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.