Daily news
(ВИДЕО) Владите на Македонија и Словенија договорија продлабочување на соработката
Со посетата на Република Словенија се афирмираат веќе исклучително добрите односи меѓу двете земји, истакна премиерот Зоран Заев на пленарната средба меѓу двете владини делегации.
„За Република Македонија е исклучително важно ова наше меѓусебно пријателство, како и поддршката што ја имаме во процесите за нашите ЕУ и НАТО-интеграции. За нас е важна и економската соработка, која ја оценуваме многу добра, и се согласивме со колегата Церар дека тука имаме уште многу што да си кажеме едни на други“ рече премиерот Заев.
Премиерот Заев ги информира домаќините за најновите настани во Република Македонија, особено во делот на реформите.
„Резултатите на изборите ни даваат поттик да ги интензивираме нашите реформски процеси и тоа се нашите определби во наредниот период. Интегративните процеси внатре во земјата исто така добија нова димензија и имаме сериозни позитивни придвижувања на овој план – потенцира претседателот на Владата на РМ, Зоран Заев.
Заев зборуваше и за очекувањата на Република Македонија во однос на евро-атлантските процеси и дека овие активности ќе имаат сериозен поттик доколку добијат поддршка од сите наши пријатели.
Во поздравниот говор на средбата премиерот на Словенија, Миро Церар, нагласи дека Република Македонија и Република Словенија отсекогаш ги поврзувало искрено пријателство и добри односи во сите области на високо рамниште.
„Економските односи се добри, но сакаме уште повеќе да ги подобриме. Имаме потенцијал за интензивирање на соработката“, истакна Церар.
Словенечкиот премиер како посебно значаен и како потврда на ова пријателство го истакна фактот дека голем број на студенти од Македонија учат на факулетите во Република Словенија.
Премиерот Церар ја искаткна целосната поддршка во ЕУ и НАТО аспирациите на Република Македонија и понуди конкретна помош и асистенција за овие процеси, во оваа фаза или во фазата на пристапните разговори со ЕУ.
Словенечката владина делегација како придонес повеќе во поддршката на Република Македонија во евро-атлантските аспирации ја сподели информацијата со македонската страна дека Република Македонија во Брисел ѝ даде нов поттик на групата земји челнки на ЕУ-пријатели на Република Македонија за да се забрза овој процес во Брисел.
Во продолжение на средбата министрите од двете страни ги информираа премиерите Заев и Церар за разговорите и за конкретните обврски што ќе бидат преземени за нови димензии на соработката меѓу Република Македонија и Република Словенија.
Владината делегација на Република Македонија, предводена од премиерот Зоран Заев, во придружба на заменик-претседателот на Владата на РМ и министер за внатрешни работи Оливер Спасовски, министерот за економија, Крешник Бектеши, министерот за земјоделство, шумарство и водостопанство, Љупчо Николовски, министерот без ресор задолжен за дијаспора, Едмонд Адеми, и државниот секретар на Министерството за надворешни работи, Виктор Димовски, одржаа билатерални и пленарна средба со своите колеги од словенечката страна предводени од премиерот Миро Церар.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.