Daily news
(Видео) Нацев: Животот дојде и во судовите, но само за Заев
Од ВМРО-ДПМНЕ обвинуваат дека денеска, како што велат, по којзнае кој пат, судот го одложил рочиштето во кое премиерот Зоран Заев се товари во кривичното дело „Поткуп“.
„Судството во Македонија се претвора во лакрдија. Наместо реформи, секојдневно гледаме фарси. Правдата е селективна, а законите не важат исто за власта и за оние што не размислуваат како СДСМ. Денеска по којзнае кој пат судот го одложи рочиштето во кое премиерот Зоран Заев се товари за кривично дело во „Поткуп“. Ова го гледаме веќе три години. Не може да се одржи рочиште за обвинение во кое првиот човек на Владата бара мито од 200.000 евра.
Да не беше трагично, ќе беше смешно.
Медиумите пред подолго време објавија и дека судечкиот судија не ни побарал камера за да се снима рочиштето како однапред да ја знае агендата на Заев. Сомнежот беше повеќе од очигледен дека и ова рочиште ќе се одложи. Доколку е така, се поставува прашањето зошто некој ја влече за нос јавноста и глуми неселективна правда закажувајќи рочишта во денови кога се знае дека ќе бидат одложени? Зошто, едноставно, не го прашаат обвинетиот Зоран Заев дали сака и кога сака да биде суден? Изгледа смешно, но македонското судство е навистина паднато на вакви гранки.
Впрочем, обвинетиот Заев самиот се назначи да го води телото што треба да ги спроведува и надгледува реформите во правосудството. Зоран Заев ѝ зборува на јавноста за реформи во судството на излегување од судницата, каде што му се одложува рочиште во кое е обвинет за поткуп. Иронијата не може да биде поголема.
Зоран Заев мртов ладен на новинарите им вели дека е разочаран од сервилноста на судиите и обвинителите, кои се тепале да му служат, но сепак не му пречи кога ги одложуваат неговите рочишта и кога одработуваат за него. За волја на вистината, овие судии и обвинители ризикуваат и сериозни повреди од тепањето за да му служат со оглед на десетиците одложувања на рочиштата против Заев. Правдата што важи за Заев не важи и за другите.
Додека на обвинетите во предметите на СЈО им се закажуваат и по неколку рочишта во една недела, рочиштата на Заев се закажуваат еднаш месечно. Додека на осомничените за 27 април неосновано им се изрекуваат притвори, а нивните жалби се разгледуваат 5 дена пред да истече 30-дневниот притвор, се толерираат разноразни средби на Заев со секретарки и вработени во амбасади и негови патувања во странство. Заев патуваше и во Сараево и во Тирана и каде сè не, а судот врз основа на разгледниците ги одложуваше рочиштата.
Обврската да се јавуваат на поканите на судот очигледно важи само за обичниот граѓанин и членовите на ВМРО-ДПМНЕ, а за Заев важат други правила. Доколку кој било друг граѓанин досега го влечеше судот за нос и не се појавуваше на рочиштата во кои е обвинет, ќе беше насилно приведен и притворен. Животот дојде и во судовите, но само за Заев“, порача Александар Нацев од ВМРО-ДПМНЕ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.