Daily news
(Видео) УЕФА Суперкуп: Реал за бори за четвртата, а Јунајтед за втората титула
Скопје одбројува до почетокот на најголемиот спортски настан во историјата на Македонија, УЕФА Суперкупот. Во вторник Реал ќе игра за својата четврта, а Манчестер Јунајтед за својата втора титула во Суперкупот. Во пресрет на натпреварот ево неколку интересни податоци од богата историја на УЕФА Суперкупот.
Првиот меч, односно двомеч во УЕФА Суперкупот, се одиграл во 1972 година, а ривали биле Ајакс и Глазгов Ренџерс, мечот во Скопје помеѓу Реал и Манчестер Јунајтед ќе биде 46-ти.
На почетокот за трофејот се бореле победниците во Купот на европските шампиони и Купот на победниците на куповите. Оваа пракса трае до 1999 година, кога УЕФА го згасна Купот на куповите, па од 2000 година за титулата играат освојувачите на Лигата на шампионите и Купот на УЕФА.
Од 2009 година за трофејот решваат екипите кои ќе триумфираат во Лигата на шампионите и Лига Европа.
Според пропозициите на почетокот се играле два натпревари (дома-гости), а од 1998 година УЕФА решава да се игра еден меч и тоа во Монако. Стадионот „Луј Втори“ во малото кнежевство е домаќин на финалните мечеви во наредните 15 години, до 2012 година, а од 2013 година финалето се игра во различен град.
Досега домаќини биле Прага, Кардиф, Тбилиси, Трондхајм, Скопје ќе биде домаќин во вторник, а наредната година Суперкупот ќе се игра во Талин, Естонија.
Инаку, во досегашната историја, Суперкупот три пати не бил одигран. Во 1974 Баерн Минхен од Западна Германија и Магдебург од Источна Германија својот двомеч не го одиграле поради дипломатски причини.
Ливерпул и Динамо Тбилиси во 1981 година не играле, бидејќи Ливерпул немал слободни термини, а во 1985 година Јувентус и Евертон не играле бидејќи англиските клубови беа суспендирани на пет години поради трагедијата на Хејсел.
Низ историјата најмногу трофеи по пет имаат Барселона и Милан, а клубовите кои во вторник ќе истрчаат на „Филип Втори“, заедно имаат четири титули, Реал три (2002, 2014, 2016) и Манчестер Јунајтед една (1991).
Реал два пати го загубил овој меч во 1998 година од Челзи и 2000 година од Фенербахче, а два порази има и Манчестер Јунајтед од Лацио во 1999 и Зенит во 2008 година.
На национално ниво шпанските клубови освоиле 13 трофеи во Суперкупот, а англиските седум. Инаку Шпанците доминираат во Суперкупот од 2009 година наваму, од последните осум тие победиле во седум финалиња (три пати Барселона, а по два пати Реал и Атлетико Мадрид), единствено Баерн Минхен во 2013 година ја прекина шпанската доминација.
Ненад Цветанов
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.