Daily news
(ВИДЕО) Швајцарско село на Алпите нуди 60.000 евра за семејства што ќе го населат
Малото село во швајцарските Алпи предложи иновативна финансиска шема за привлекување млади семејства на својата идилична локација. За да се обнови, општината на секое четиричлено и поголемо семејство му нуди до 60.000 евра за да се насели таму.
Во амбициозните напори за зголемување на популацијата на селото Албинен локалните власти им нудат на возрасните што се помлади од 45 години околу 25.000 швајцарски франци (21.500 евра) да се преселат на стрмните падини на живописната комуна во Валеанскиот кантон. За секое од нивните деца, според шемата наведена во писмото од заедницата, семејството ќе добие дополнителни 10.000 франци (8.500 евра).
„Тоа е многу добра парична инвестиција за иднината на селото“, објаснува општината, во својот амбициозен план, во кој има и одредени услови.
Додека парите понудени на новите семејства ќе го промовираат преселувањето на Албинен, новодојдените треба да се населат таму следните десет години. Исто така, од нив се бара да инвестираат 200.000 швајцарски франци (170.000 евра) за купување или изградба на нови домови за кои општината верува дека ќе донесат поврат од 1,5 милион швајцарски франци (1,3 милион евра) во текот на следните десет години.
Администрацијата исто така се надева дека новите семејства ќе го обноват локалното училиште, кое се затвори поради недостигот на ученици, и ќе инјектираат нов живот во заедницата, која во моментот изнесува само 240.
Општината предвидува три сценарија за селото. Најлошиот случај е дека планот ќе пропадне и селото ќе изумре. Во вториот случај, вистински, општината се надева да привлече пет семејства од 10 возрасни и 8 деца до 2020 година. Администрацијата на Албинен предвидува дека и толку мал прилив ќе генерира 200.000 швајцарски франци (170.000 евра) во дополнителни даночни приходи за заедницата. Понатаму, тој износ ќе се плаќа во локалната каса со приходите добиени од данок на промет.
Во оптимистичкиот најдобар случај селото ќе привлече повеќе двојно повеќе луѓе, што ќе донесе и ќе генерира двојно повеќе приходи.
Селото се издига на швајцарските Алпи на надморска височина од 1.275 метри. Опколено е со пасишта и поглед што го одзема здивот. Се наоѓа на југ од земјата меѓу два потока, кои се изложени на многу сонце. Работни места во самото село не изобилуваат, но Албинен е во близина на неколку поголеми градови. Селото има автобуска конекција LLB-Albinen-Leuk. Берн, главниот град на Швајцарија, е на само 177 километри ако ја преземе кратката рута низ Алпите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.