Daily news
Владата не ја менува одлуката за стоп на серијата и по трејлерот на „Јадран филм“
По вчерашното објавување на трејлер, кој е наводно од првата снимена сезона од серијата „Македонија“, а се појави по серијата написи и конечно по изјавата на владиниот портпарол на 1 ноември, со која на владината седница претходниот ден била донесена одлука за стопирање на снимањето на оваа серија, „Макфакс“ дознава дека одлуката на владата останува непроменета.
„Владата на Република Макдонија ја донесе својата одлука и ќе постапи во согласност со истата“, ни изјави портпаролот на владата Миле Бошњаковски.
Како што дознавме, и финансиската полиција која констатираше финансиски нерегуларности и злоупотреба на службената должност од овластени лица во Агенцијата за филм, а за истото ја информираше неодамна јавноста, за овој предмет се консултирала и со Основното јавно обвинителство.
На 1 ноември Бошњаковски ја соопшти одлуката на Влада со која се прекинува снимањето на серијата вредна 4,6 милиони евра.
„ Според Агенцијата за филм на Република Македонија, извршената контрола во врска со доделувањето средства за овој проект и во врска со реализацијата на проектот, констатирала сериозни пропусти. Владата ја разгледа и ја усвои информацијата во врска со проект-играна серија ‘Македонија’ и ја задолжи Агенцијата за филм на Република Македонија во рок од 7 дена до Владата да достави информација во врска со преземените активности за проектот, согласно со Законот за филмска дејност. Според овој закон, доколку со извештајот од извршената контрола се утврди дека доделените средства на конкурсот се користат спротивно на договорот, односно дека корисникот на средствата не се придржува на роковите и обврските утврдени во договорот, или дека филмскиот продуцент ги пренел правата од филмот и средствата добиени од Агенцијата на трети лица, директорот на Агенцијата ќе ја активира банкарската гаранција, ќе го раскине договорот и ќе донесе решение со кое се прекинува натамошното финансирање на проектот и со кое бара враќање на доделените средства од Агенцијата со законска затезна камата“, стоеше во соопштението на Владата.
Седум дена подоцна продукцијата не го демантираше барањето, но се обрати со соопштение во кое го тврдеше спротивното, односно дека „македонската влада била погрешно информирана“.
Но, вчера продукцијата „Јадран филм“ до медиумите испрати соопштение и трејлер со бомбастична најава за успехот на серијата.
Според упатените, трејлерот е очигледно измонтиран наменски за да ги покрие сомнежите за злоупотреба.
Во договорот со Агенцијата за филм, до 4 септември требало да биде доставен севкупниот материјал, поточно епизодите од првата сезона за кои македонската Агенција за филм дала 68 милиони денари, односно милион и сто илјади евра, како прва рата од предвидените вкупно 283 милиони денари, поточно 4,6 милиони евра за 4 сезони.
По извршената вонредна контрола на регуларноста на проектот е утврдено дека нејзиното снимање треба да се стопира.
Еден од условите е во процесот на продукција да не се менуваат носителите на проектот, но од оној со кој се конкурирало во Агенцијата до тие денес единствено не е променето името на продуцентот Винко Грубишиќ.
Серијата „Македонија“ беше одобрена на конкурсот за поддршка на проекти од национален интерес во филмската дејност за 2016, во мандатот на поранешната директорка на Агенцијата за филм, Мими Ѓоргоска-Илиевска. Според резултатите од конкурсот, објавен на сајтот на Агенцијата за филм, серијата треба да има 130 епизоди во 4 сезони и е одобрена за повеќегодишно финансирање. Како режисери се наведени Зоран Петровски, Стојан Вујичиќ, Кристијан Милиќ, сценаристи Бранко Шомен, Огнен Ѓеоргиевски и Никола Жежов. (А.В)
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.