Daily news
Владата ќе ги стимулира компаниите да даваат поголеми плати
Вицепремиерот Анѓушев на состанок со стопанствениците од Велес: Новиот концепт за привлекување на инвестиции можност за развој на сите компании
Заменик претседателот на Владата задолжен за економски прашања, Кочо Анѓушев на покана на Регионалната комора во Велес оствари средба со претставниците од бизнис секторот во Велес и околните места.
На оваа средба, на која присуствуваа четириесетина претставници на компании, Анѓушев презентираше дел од мерките од новиот владин концепт за привлекување на инвестиции кои се во подготовка и ќе бидат презентирани на целата јавност кон средината на месец септември.
Тој даде кус осврт на новиот концепт за привлекување на инвестиции, кој ќе биде транспарентен, со јасно дефинирани критериуми, без можности за дискрециони одлуки на било кој член на Владата и со кој еднакво ќе се третираат домашните и странските компании.
„Новиот концепт за привлекување на инвестиции што го развиваме, а кој е во согласност со Законот за директна државна помош, соодветно и еднакво ќе ги третира домашните и странските инвеститори, без разлика дали ќе работат во технолошко индустриските или локалните индустриски зони или надвор од нив. Ќе се поддржуваат здрави компании, кои покажуваат раст во нивното работење и кои сакаат да ги прошируваат своите капацитети. Посебен фокус ќе се стави на извозно ориентираните компании, кои создаваат производи со повисока додадена вредност, пред се затоа што Македонија е мал пазар и сакаме да имаме конкурентни компании и на меѓународните пазари“, порача Анѓушев пред бизнисмените.
Вицепремиерот истакна дека во тек е детална анализа за тоа колку средства, во форма на директна државна помош беа наменети во минатите години за поддршка на странските инвестиции и дека набрзо сите податоци ќе бидат јавно презентирани.
Оваа влада, додаде вицепремиерот, ќе се насочи и кон иднината, при што истакна неколку мерки со кои смета дека навистина ќе се поддржи македонското стопанство и кои ќе придонесат за забрзан развој на фирмите, со што растот на бруто домашниот производ би изнесувал околу 5 отсто на годишно ниво.
„Ќе ги задржиме младите во Македонија. Со директна финансика поддршка од Владата, по претходно утврдени критериуми, ќе се стимулираат компаниите кои ќе исплаќаат повисоки плати за одреден процент од минималната плата дефинирана со закон. Дополнително, со цел да се задржат младите стручни кадри со завршено високо образование, ќе се стимулираат фирмите да исплаќаат повисоки плати, а дел од примањата, повторно по претходно дефинирани критериуми, ќе биде надоместен од страна на државата. На тој начин очекуваме дека ќе бидат задоволни и компаниите и работниците. Компаниите ќе бележат развој и ќе имаат задоволни вработени, ќе имаме раст на платите за работниците и ќе ги задржиме младите и стручни кадри во земјата. Сепак треба да се нагласи дека станува збор за вработени во нови инвестиции, а тие компании ќе треба да покажат и добивка во завршните сметки за да добијат поддршка од државата“, дополни вицепремиерот Анѓушев.
На состанокот стопанствениците изнесоа и свои идеи, размислувања и проблеми со кои се соочуваат во работењето, а кои се однесуваат на подобрување на инфраструктурата, административни работи како и интервенции во закони и подзаконски акти.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.