Daily news
Владата ќе го преземе управувањето со колекторот во Охрид
Премиерот Зоран Заев вчера доцна попладне имал одделни повеќечасовни средби со в.д. градоначалникот на Општина Струга, Мустафа Забзуни, и со градоначалникот на Општина Охрид, Никола Бакрачески, во придружба на нивните најблиски соработници. На средбите, на кои присуствувал и министерот за финансии Драган Тевдовски, градоначалниците на Струга и Охрид изразиле голема благодарност до премиерот Заев што ги поканил за да разговараат и да најдат решенија за проблемите со кои се соочуваат овие два града.
Двете општини се соочуваат со хронично блокирани сметки поради долговите создадени од повеќе причини, но во најголем дел поради кумулираните обврски од ненавременото намирување на кредитот од Европската банка за обнова и развој. Кредитот во 1998 година го договори тогашното Министерство за трговија за изградбата на колекторот за прочистување на Охридското Езеро, а потоа отплатата на овој кредит им го префрли на општините. Градоначалниците и премиерот Заев разгледале повеќе опции како да се излезе од оваа ситуација и да се најдат решенија што ќе бидат трајни и нема да создаваат последици за нови задолжувања. Премиерот изразил подготвеност овие проблеми да се решат многу бргу за да можат двете општини да се растоварат од ова прашање и без финансиски хипотеки да ги спроведуваат развојните политики за кои и двата града имаат сериозни потенцијали.
Премиерот Заев исто така ја најавил подготвеноста на Владата управувањето на колекторот за прочистување на Охридското Езеро да биде изземено од надлежноста на општините бидејки, како што нагласил, грижата за ова природно богатство заштитено со УНЕСКО повеќе не смее да биде препуштена на ризиците од загадување. Покрај тоа, едно такво решение ќе го олесни работењето на општините Струга и Охрид. Премиерот соопштил дека ќе биде подготвен детаљен проект за негова реконструкција и доградба за трајна заштита на водите на Охридското Езеро.
Градоначалникот на Охрид, Бакрачевски, изразувајќи ја уште еднаш својата благодарност за исклучително конструктивната поддршка и разбирање на премиерот Заев, замолил за помош од Владата за регионалната депонија за отпад, нешто за што била заинтересирана и општинската делегација од Струга. Заев рекол дека ова прашање е од врвен приоритет и е од интерес на граѓаните најавувајќи први интервентни и краткорочни мерки како прва фаза од трајното решавање на овој проблем за кој Владата интензивно барала најдобра солуција не само за Охрид и Струга туку за сите плански региони.
Премиерот Заев им порачал на двете делегации на општините Струга и Охрид дека вратите на Владата се отворени за нив, како и за сите други општини и дека во прв план на актуелната Влада се интересот и решавањето на проблемите на граѓаните во сите општини, без разлика која политичка партија е на чело на локалната самоуправа.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.