Daily news
ВМРО-ДПМНЕ: Владиниот систем за односи со јавност на ВМРО-ДПМНЕ беше далеку потранспарентен, поефикасен и поефективен од овој сега
Од ВМРО-ДПМНЕ реагираат на денешната прес-конференција на Владата, на која портпаролот Миле Бошњаковски истакна дека владиниот систем за односи со јавност во времето на ВМРО-ДПМНЕ несоодветно функционирал.
„Енергично и во целост ги отфрламе сите небулози, лаги и конструкции што се истакнати на денешниот брифинг на Владата, а кои се однесуваат на наводно несоодветно функционирање на владиниот систем за односи со јавност во времето кога ВМРО-ДПМНЕ беше на власт. Одговорно тврдиме дека владиниот систем за односи со јавност во времето на ВМРО-ДПМНЕ беше далеку потранспарентен, поефикасен и поефективен отколку што е во моментот системот за односи со јавност кој е предводен од пренатрупаната и голема машинерија на СДС.
Владината служба за односи со јавност во времето на ВМРО-ДПМНЕ, и тоа преку премиерот, министрите и портпаролите во поголем обем и мера, информира за владините мерки, политики и точките на дневен ред што се разгледуваа на владините седници отколку што тоа се прави во моментот кога се глуми квазитранспарентност со објавување најчесто неколку точки од дневниот ред кои се разгледуваат на владина седница во првите три-пет минути од седницата и тоа секому што е дел од медиумската сцена му е кристално јасно.
Исто како што на секој упатен му е совршено јасно дека денешната работа што ја извршуваат над 40 лица од големата и тромава служба за односи со јавност на Владата на СДС, порано кога ВМРО-ДПМНЕ беше во владата беше во најголем број случаи реализирана од само три лица, кои по инсталирањето на СДС во Владата, ги напуштија своите позиции во согласност со своите политички убедувања.
Во времето кога ВМРО-ДПМНЕ беше на власт речиси секојдневно премиерот ги соопштуваше политиките и мерките и одговараше на десетици прашања од новинарите, исто како и портпаролите на Владата, исто како и министрите што транспарентно информираа за политиките од својот ресор на јавни настани. Се разбира дека во некои случаи и најчесто од објективни причини не бевме во можност да одговориме баш на секое прашање за што се надеваме на разбирање од страна на новинарите, но дека одговаравме на значително поголем број прашања од интерес на новинарите во споредба со денеска, што е факт кој никој не може да го негира. И тоа одговаравме и во работни и во неработни денови, во кое било време од денот, што според информации што ние ги имаме од релевантни новинари, не е случај и денеска.
На крајот би додале дека никој, ама баш никој од службите за односи со јавност во Владата и во министерствата додека ВМРО-ДПМНЕ беше на власт, не работел под некаква наводна присила или бил манипулиран, напротив, лицата што на кој било начин имале улога во односите со јавноста тоа го правеле со голем ентузијазам и елан како и јавното декларирање на воодушевеност од политиките што се преземаа од страна на Владата предводена од ВМРО-ДПМНЕ, и тоа одговорно го тврдиме.
Се надеваме дека во иднина СДС ќе го промени овој стил на однесување и политичката борба, наместо со квазибрифинзи полни со небулози, лаги и конструкции, ќе ја води на достоинствен начин како борба на политички идеи и однесување базирано на вистината“, се додава во соопштението.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.