Daily news
(ВИДЕО) ВМРО-ДПМНЕ во Вевчани ќе оствари убедлива победа, порача Груевски
ВМРО-ДПМНЕ во Вевчани ќе оствари силна и убедлива победа и повторно за градоначалник на општината ќе се избере Цветомир Угриновски, рече лидерот на ВМРО-ДПМНЕ, Никола Груевски, од митингот вечерва во Вевчани.
„Во оваа кампања гледам дека работите одат онака како и што можев да ги предвидам, во кампањата на нашите опоненти гледам само гнев, омраза, омаловажување и некое лажно ветување, а она што ние го зборуваме како во минатото така и денес се конкретни проекти кои ќе ги направиме за граѓаните и, се разбира, отчет за сработеното. Освен што слушаме навреди и омаловажувања, нашиот опонент нуди нешто што е општо, нуди живот како ние сите да сме мртви или нуди воздух како да го немаме или, пак, енергија. Она што е карактеристично за овој период е тоа дека многу криминалци се пуштија од затворите токму пред изборите, а тоа укажува дека станува збор за опоненти што се слаби, уплашени и што знаат дека по регуларен пат ќе загубат и се обидуваат со вакви криминални структури да променат нешто. Она што ќе им го порачам е дека на овој начин тие не само што ќе загубат, туку и ќе се изрезилат пред целата јавност“, рече Груевски.
Тој рече дека според неговите информации, по локалните избори планот на новата Влада е правење бегалски кампови по должината на јужната граница и подоцна да се раселат во целата земја и да им се најде работа и да им се дадат државјанства.
Во обраќањето Груевски рече дека локалната самоуправа во Вевчани во изминатите четири години направила колку што никогаш во оваа општина не било направено.
„Со сите мерки за привлекување нови инвеститори и отворање нови работни места значително се намали невработеноста во Република Македонија, се отворија над 173.000 нови работни места. Во Вевчани во 2006 имало 298 вработени лица, а на крајот на 2016 има 566 вработени лица. Во последните десет бројот на вработени лица е зголемен 90 проценти овде во Вевчани. Во Вевчани изградивме нова училишна зграда, со површина од 2.450 квадратни метри, во вредност од 65 милиони денари“, изјави Груевски.
Кажа дека се изградени и спортска сала, тениско игралиште, комплетно е уреден просторот околу училиштето „Страшо Пинџур“. Груевски напомена дека во Вевчани сега и нема неасфалтирана улица, дека се реконструирани мостовите во општината, реконструирана била фонтаната, која е атракција за туристите.
„За пензионерите од Вевчани во просториите на општинската зграда изграден е дневен центар за стари лица. Исто така, се отвори и младински центар, кој припадниците на помладата генерација од Вевчани го користи за социјални, културни и едукативни настани. Целосно е реконструирана и детската градинка во Вевчани“, изјави Груевски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.