Daily news
ВМРО-ДПМНЕ ги отфрли обвинувањата дека се мајтапи со интересите на Турците
ВМРО-ДПМНЕ ги отфрли, како што тврдат, лагите и манипулациите што ги изнесе Партијата за движење на Турците во Македонија, која ја обвини оваа партија дека 11 години додека била на власт ги игнорирала интересите на оваа заедница, а сега кога е во опозиција, се мајтапи со поднесување барања во нивна корист.
„Партијата за движење на Турците во Македонија прифаќа да одработува политички цели на СДС со надеж дека на тој начин ќе се обиде да го скрие фактот дека СДС јавно и гласно ги навредуваше Турците нарекувајќи ги со погрдни зборови и посакуваше лоши работи за Република Турција.
Додека јавно по социјалните мрежи Јани Макрадули, заменскиот министер од СДС, ги поддржуваше написите со кои се навредуваат Турција и турскиот народ, ние јавно ги повикавме претставниците на СДС и Зоран Заев да му се извинат на турскиот народ. Но, ниту Јани Макрадули се извини ниту СДС се огради.
ВМРО-ДПМНЕ секогаш се залагала за доброто на турската етничка заедница во Република Македонија и за тоа постојат конкретни и реални факти. Зад нас стојат многу проекти од областа на економијата, бизнисот, здравството, образованието, културата, книжевноста, театарската уметност и многу други полиња кои придонеле за интересите на турската етничка заедница.
Воспоставивме празник на турската етничка заедница во Република Македонија.
Изградивме нова куќа посветена на родителите на Мустафа Кемал Ататурк во Коџаџик, Центар Жупа. Изградбата на овој спомен-дом е силен материјален доказ за одличната соработка на Република Македонија со Република Турција.
Придонесовме за превод на македонски јазик на дела од турската книжевност во Македонија застапени во проектот „135 тома македонска книжевност“ и со реализацијата на овој проект македонската читателска јавност има можност да се запознае со спецификите на турските книжевни вредности.
На 18 јануари 2014 година беше поставен камен-темелникот на новиот објект на Турскиот театар. Со буџетски средства од Министерството за култура во висина од 4,5 милиони евра е завршена првата фаза од изградбата.
Се доделуваа и стипендии за изучување на старотурскиот јазик и многу други проекти што ги креира и ги исполни владата предводена од ВМРО-ДПМНЕ сè со цел негување на односите со турската заедница.
Ние како партија секогаш ќе се залагаме за доброто на турската заедница во нашата земја и ќе ги подржуваме пријателските односи помеѓу Република Македонија и Република Турција“, се вели во реакцијата на ВМРО-ДПМНЕ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.