Daily news
ВМРО-ДПМНЕ најави нов проект за обезбедување дом за секое семејство
Поседување сопствен дом е гаранција за сигурна иднина на секое семејство и неговите идни поколенија. ВМРО-ДПМНЕ како партија која се грижи за потребите на народот во рамки на единиците на локалната самоуправа ќе се погрижи секој граѓанин да дојде полесно до свој сопствен дом преку проектот „Стекнување на сопствен дом“, рече денеска Светислав Васев од ВМРО-ДПМНЕ.
„Овој проект става акцент посебно на младите семејства кои сакаат да имаат свој сопствен дом, но немаат доволно финансиски средства. Со овој проект ВМРО-ДПМНЕ ќе овозможи семејствата да дојдат до сопствен дом по многу ниски трошоци. Проектот опфаќа две компоненти.
Првата компонента е единиците на локалната самоуправа да обезбедат земјишта за изградба на нови куќи. Ова земјиште ќе биде поделено на парцели, а парцелите ќе се даваат на јавна аукција. По цена од 1 евро за 1 метар квадратен.
Да, почитувани граѓани, 1 евро за 1 квадратен метар. Со тоа што ако еден млад брачен пар се одлучи да купува земјиште за 300 евра ќе може да купи 300 метри квадратни. Со тоа младиот брачен пар заштедува од 20 до 50 евра по метар квадратен зависно во која општина живее“, нагласи Васев .
Тој додаде дека парцела во нормални услови би ја купиле по цена од 6.000 до 15.000 евра, а преку проектот на ВМРО-ДПМНЕ граѓаните парцелата ќе можат да ја купат за само 300 евра.
„Дополнително, младите брачни парови ќе имаат можност за ослободување и од комуналните трошоци во зависност од нивните месечни примања. Со тоа што да потсетиме дека комуналните трошоци во зависност од општината се движат од 1 евро до 100 евра за еден метар квадратен. И преку овој проект младиот брачен пар ќе заштеди до 30.000 евра во зависност од општината во која живее“, рече Васев.
Тој нагласи дека семејства со приходи во висина до 1 просечна нето плата ќе добијат – 100% ослободување од комуналии. За оваа категорија на граѓани и земјиштето ќе биде дадено бесплатно. Семејства со приход од 1 до 2 просечни нето плати ќе добијат 75% ослободување од комуналии. Семејства со приход меѓу 2 и 3 просечни нето плати ќе добијат 50% ослободување од комуналии и Семејства со приход од 3 до 5 просечни нето плати ќе добијат 25% ослободување од комуналии.
Општината ќе има обврска од сопствени средства да обезбеди патна и комунална инфраструктура на граѓаните за овие локации.
„Втората компонента на овој проект се однесува за надградба на постоечки куќи. Предвидуваме ослободувањето и намалувањето на комуналии да може да се користи и доколку семејството сака надградба. Истите повластувања ќе ги имаат и семејствата кои што ќе се одлучат на надградба. ВМРО-ДПМНЕ секогаш нуди решенија, затоа и овој пат излеговме со решение кое ќе го примениме во секоја општина каде ќе ја добиеме локалната власт“, рече на денешната прес-конференција Васев.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.