Daily news
ВМРО-ДПМНЕ: Со синоќешните акции во Прилеп и Битола СДС ги злоупотреби институциите за изнудување пари
Алчноста на Заев, Вицето и Анѓушев нема крај. По нивното доаѓање на власт се формираше „Омерта“, агенција за обезбедување, чие име во италијанската мафија подразбира завет за молчење. Почнаа да се палат возила на сите сопственици на кафулиња кои имаат ангажирано некое друго обезбедување. После криминалните јуришници, според стратегијата на СДС следува злоупотребата на институциите за изнудување пари. Доцна синоќа на удар беа локали во Прилеп и Битола кои немаат врски или не платиле некому од локалното раководство на СДС или директно кај Вицето, велат од ВМРО-ДПМНЕ во денешното партиско соопштение.
„Зоран Заев, Вицето, Кочо Анѓушев и останатите од криминална врхушка на власта мора да продолжат со расипништвото и личното богатење. Идеи за нови проекти кои би донеле дополнителни средства во буџетот немаат бидејќи се фокусирани само на полнењето на личните конта. Затоа ситните земјоделци мора да им платат арач и затоа мора да ја качат акцизата на нафтата и сите да плаќаме поскапо гориво“, велат од ВМРО-ДПМНЕ.
Од партијата прашуваат кој им јавил за инспекциите на оние на кои не им беа пишани казни и колку наплаќале Заев и Вице за едно такво јавување?
„Минатиот викенд Заев и потпретседателот на СДС, Оливер Спасовски, ги злоупотребуваа полициските специјалци за да ги заплашат сопствениците на одредени локали во Скопје и нивните гости. Направија штета и кај оние каде беше утврден некаков прекршок, но уште повеќе кај оние каде не успеале да исценираат ништо. Нивните гости беа избркани и исплашени. Беше испратена порака кого треба да ангажираат за обезбедување и каде треба да завршуваат нивните приходи. Зоран Заев, Вицето и Анѓушев освен што имаат одговорност за криминалните набавки и одлуки, имаат одговорност и за сите антимакедонски одлуки кои ги носат“, нагласуваат од ВМРО-ДПМНЕ.
Во ситуација, како што велат од партијата, кога Заев брише учебници по историја и се откажува од илјадници жртви, кога склучува договори за добрососедство со кои им ја одзема националната припадност на нашите херои или носи закони со кој Македонија станува двојазична држава, очекувано е тогаш да биде текпиран и рекетот и убиствата и злоупотребата на полицијата и другите институции.
„После враќањето на правната држава и заминувањето на криминалците од власта, институциите на државата без притисок од власта ќе ги испитаат сите наводи за злоупотреби и на Лукаревска и на Спасовски, актуелни први луѓе на УЈП и МВР“, велат во соопштението од ВМРО-ДПМНЕ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.