Daily news
ВМРО-ДПМНЕ ја обвинува Мила Царовска за кратење на пари од градинките
ВМРО-ДПМНЕ ја обвини министерката Мила Царовска дека крати од парите наменети за градинки и со тоа удира по интересите на семејствата, иако вчера таа отвпори нова градинка, прва во рурална средина.
„Неспособноста на владата на СДС безмилосно удира по интересите на семејствата.Со ребалансот на буџетот неодговорната министерка Мила Царовска крати 5 600 000 денари кои беа наменети за изградба и опремување на детски градинки.
Ова ја покажува целата негрижа на владата на СДС кон граѓаните и нивните потреби. СДС ги лажеше граѓаните пред избори ветувајќи зголемување на опфатот на деца во градинки за 50%, а сега кога се сместија во фотелјите, ги поздравија граѓаните со кратење на 5 600 000 денари кои беа наменети за нови градинки, и тоа во делот на нивното опремување, бидејќи изградбата во најголем дел ја покриваат општините.
Факт е дека со намалени средства некоја од предвидените градинки за отворање во 2017 година нема да се отвори затоа што нема пари за опрема. Овие 5 600 000 денари кои СДС ги крати, беа доволни за опремување и отворање на 5 до 6 нови помали градинки кои беа предвидени во програмата за 2017 година и е многу веројатно дека заради неспособноста на Царовска оваа 2017 година нема да се отвораат градинки во некоја од следните општини Прилеп, Ново Село, Кавадарци, Свети Николе, Бутел, Ѓорче Петров и други општини во Скопје. Едноставно, помалку пари, помалку градинки.
На овој начин Царовска внесува хаос и неизвесност кај семејствата кои нема да знаат дали во нивната општина ќе има нова градинка, бидејќи заради намалените средства логично е да се очекува дека најмалку 5 градинки нема да бидат отворени.
Ја слушаме вчера како несмасно и непринципиелно се пофали дека ќе отворела нови 13 градинки. Прво, сите овие градинки беа предвидени да се градат од страна на владата на ВМРО-ДПМНЕ и некои од нив се во подлабока фаза на реализација, што значи дека Царовска се кити со туѓи резултати, и тоа немаше да биде толку трагично ако Царовска од опозиција не ги критикуваше и исмеваше овие наши чекори за изградба на градинки. Второ, фалејќи се, лицемерната Царовска не кажува дека заради тоа што скрати 5 600 000 денари нема да се отворат најмалку 5 до 6 нови градинки, бидејќи таа лично ги укинува парите за нивно опремување и адаптација. И трето, имајќи ја во предвид неспособноста на Царовска ние веруваме дека таа нема да ги исполни нејзините зборови, затоа што сите знаеме дека едно говорат, а сосема друго прават. Едноставно, тие немаат навика да работат.
Неодговорноста, лицемерието и неработата на владата на СДС предизвикуваат хаос и неизвесност кај граѓаните, и го уназадуваат општеството. Набрзо, неспособниот СДС ќе се соочи со политичката одговорност за нивната неработа и негрижа“, изјави Ирена Попова.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.