Daily news
Во прилепско одбележан празникот Вознесение Христово – Спасовден
Со божествена литургија, режење на славскиот колач и водосвет денеска во неколку прилепски населени места како Волково, Кален, Вепрчани, Полчиште и други беше одбележан христијанскиот празник Вознесение Христово – Спасовден, кој воедно е и слава на овие села.
На одбележувањето присуствуваа стотици граѓани, не само жителите кои моментално живеат таму, туку и оние кои одамна се иселиле, а за овие празници се враќаат назад во родното огниште да се видат со своите роднини и пријатели и заеднички да ги поминат овие празнични денови.
„Многу е убаво да се присуствува денеска тука, многу ми е мило што има доста луѓе присутни на овој манастир во селото Волково. Денеска навистина се чувствувам многу убаво и можам да кажам дека често пати се пријавувам да бидам домаќинка на славите во повеќе прилепски манастири“, рече Мирјана Чорбеска, домаќин на славата во манастирот во н.м. Волково.
„Јас прв пат сум домаќин во манастиров и многу се радувам што гледам дека тука се присутни голем број верници. Чувството да се биде домаќин е одлично и затоа и се пријавив минатата година“, кажа Љубе Седлоски, домаќин на славата во манастирот во н.м. Волково
Градоначалникот на Прилеп, Марјан Ристески, ги посети овие населени места честитајќи им го празникот на жителите и именденот на оние кои празнуваат овој ден.
„Присуствуваме на уште еден голем христијански празник Вознесение Христово – Спасовден. Патот кој води до ова н.м. Волково и до манастирот се изгради минатата година. Неговата изградба е причина за да денес тука има голем број на присутни верници. Во иднина се планира да се догради овој пат до н.м. Прилепец и до манастирот до ова селото, така што и двата манастири и двете села во иднина ќе бидат поврзани со асфалтен пат. Исто така околу овој манастир во Волково предвидено е да се засадат дрвја и да се направи еден убав парк. Во оваа прилика им го честитам големиот празник на сите православни христијани во Македонија, им посакувам здравје, успех, среќа и радост, да имаат само убави моменти, да ги продолжиме овие наши традиции и сите оние кои го носат името на денешниот ден нека им е честит именденот“, изјави Марјан Ристески, градоначалник на Прилеп.
Освен во Волково Ристески присуствуваше на одбележување на празникот и во мариовските села Кален и Полчиште.
Инаку според православната црква денеска се одбележуваат четириесет дена од Воскресението на Исус Христос. Господ во текот на 40 дена по своето Воскресение им се јавил на учениците, зборувајќи им за царството Божјо и им заповедал да не го напуштаат Ерусалим, туку да го чекаат слегувањето на Светиот Дух, на 50-тиот ден од Воскресението. Потоа ги извел своите ученици во Витанија, ги благословил и се вознел на небото. Овој празник се нарекува Спасовден затоа што во денот на Христовото вознесение се довршило делото на спасението.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.