Daily news
Вучиќ најави грижа за Србите во Македонија
Новиот претседател на Србија, Александар Вучиќ, во првиот говор по стапнувањето на функцијата најави дека сака да гради подобри односи со Македонија и дека секогаш ќе биде со Србите што живеат во нашата држава, покрај останатите во регионот.
“Да, ние сакаме да ги подобри односите со Хрватска, ќе продолжиме да ја подобруваме соработката со БиХ, со Албанија, Црна Гора и Македонија, како и со Унгарија, Романија, Бугарија,” најави Вучиќ, па продолжи:
„Како претседател на Србија секогаш ќе бидам со нашиот народ што живее во опкружувањето, во Република Српска, во Црна Гора, Хрватска, Македонија, Словенија и Романија. За да помогнам во зачувувањето на храмовите и манастирите на Српската црква во сите овие земји, бидејќи само таму каде што е силна СПЦ, нашиот народ успеа да ги сочува своите огништа“, рече Вучиќ.
Околу преговорите со Косово тој најави дека ќе го сочува интегритет на Србија, но секогаш ќе прифаќа разговори со косовските Албанци, бидејќи со тоа ги штити Србите и го чува и брани мирот. Притоа, го отвори прашањето за внатрешен дијалог околу Косово, кој според него може да биде поважен од тој што се води со Албанците. Оградувајќи се дека тој дијалог ќе биде во рамките на Уставот, тој оцени дека треба да биде отворен и ослободен од митскиот пристап, но без лесно давање на она на што имаат право.
Глорифицирајќи ја практично својата политика досега, тој оцени дека Србија престанала да моли за трошки, дека почнала да верува во себе и дека изградила основа за иднината.
” Имам намера, заедно со српската влада, да продолжам да градам. Да поднувам, заедно со сите во Србија, кат по кат, чекор по чекор, плоча по плоча, без желба таа градба било кога ја завршам, туку само да ја подигнам доволно високо, доволно стабилно за да други по мене,по нас, можат да одат во невидени нови височини “, рече новиот претседател. На крајот тој порача дека никој не треба да се сомнева дека е посветен на европскиот пат и тоа не е колатерална реченица или фраза научена од сите лидери на Балканот, туку дека навистина сака да изгради демократско општество. Но, додаде тој, нема да дозволу никому да му наштети и на пријателството со Русија и дека ќе се спротивстави на сите притисоци да не гради добри односи со оваа држава.
“Оваа политика ќе ја следиме и во иднина. Ние сме горди на ова пријатеслтво и воопшто не се срамиме “, рече тој, додавајќи дека во исто време тие што мислат дека Србија не треба да гради стратешки односи со САД поради спротивните ставови околу Косово ќе направат огромна штета на интересите на Србија.„Јас тоа сигурно нема да го сторам“, порача Вучиќ.Крај/мф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.