Daily news
Гоце Наневски: Анатомијата на уметноста во патологија на векот
…Идеална почва за уметничко создавање, особено за оној кој сака да проговори, коментира и обликува дело што кореспондира и создава став понатаму и идентитет. Уметниците не можат и не смеат да останат имуни на грешките во општествениот софтвер, и на висина на задачата се тогаш кога ќе успеат да инјектираат позитивен вирус, што можеби е мал чекор до историски промени. Тоа што суштествено го објаснува концептот и поривот, уметникот Наневски го изнесол во своето дело, но за сите оние филозофски и социјални прашања поврзани со креативноста и делувањето во општеството се обидовме да одговориме во интервјуто реализирано додека течеа последните подготовки пред изложбата.
Смислата на раѓањето, судбинските околности и, конечно, „вампирските“ опструкции да се дооформи еден благороден животен простор се трите појдовни точки за реализација на концептуалната видеотрилогија на ликовниот уметник Гоце Наневски, насловена како „Анатомија на векот“. Од вечерва, во 20 часот, во Мала станица, посетителите ќе можат да го погледнат овој сложен и несекојдневен уметнички израз. Создаден како еден внатрешен импулс, со максимален ентузијазам и минимална поддршка од ресорното министерство, Наневски нуди еден „интимен универзум“ што треба да одговори на елементарните размисли што го измачуваат цивилизираниот човек во македонскиот микрокосмос. Во соочувањата со самите себе, дел од соговорниците (не)свесно доаѓаат до одговори, а креативно сложени во монтажата на Наневски градат конструктивна спротивставеност или дебата – толку многу кај нас потребна годиниве.
Станува збор за три индивидуални видеа кои имаат концепциско-документаторски карактер. Како што наведува кураторот на изложбата, „Наневски во оваа трилогија е социјално-политички ангажиран. Неговиот јазик не е буквален и директен, не е априорна реакција и критика на актуелното секојдневие туку преку малите суштествени наративи со многу генерална конотација укажува на мошне клучни деформации на општествената свест, кои ги дефинираат ликот и опачината на претставникот на едно трансформирачко општество без видлив расплет.“
ЖИВОТНИОТ ВЕК Е МИСТЕРИОЗНА СКУЛПТУРА
„Анатомија на векот“ е амбициозен наслов на едно уште поамбициозно дело. Од каде поривот и идејата за создавање на оваа креација, уште повеќе во една општествена атмосфера во која земјава се наоѓа подолго време?
– Времето во кое живееме е истовремено многу инспиративно, но многу тешко за создавање уметност, од проста причина што уметникот е на самите маргини, да не речам исфрлен од општеството. По некаква пирамидалност, човекот веројтно треба да ги задоволи сите оние биолошки потреби, па да стигне потребата да се консумира уметност, да си дозволи да ја купи. Низ таков еден процес уметникот ќе може да живее од сопствениот продукт а и ке може да реинвестира во ре-продукција на нови дела. Тоа е едната страна на нештата, додека другата е дека времето и местото во кои живееме се ултра инспиративни, податливи за создавање. Поривот да создава, еден ликовен работник може да биде повеќеслоен. Исклучиво ликовен, емпириски, но може да биде и социјален, политички, психолошки, во поширока смисла кажано, ангажиран и едноставно може да бара микро ии макро локации каде што ќе црпи и ќе обликува нешто што него го допира.
Она што мене ме провоцира е местото каде што ние живееме, се раѓаме и се обликуваме. Моето растење е проследено со многу несигурни моменти и неизвесности, со војниво околината, и логично е да исфрли некаков импулс- момент кој нè тера да работиме и да се осврнеме на сето тоа. Некако ми беше задоволство да го истражувам тоа низ еден ликовен контекст, низ ликовна патека и навистина уживав во тоа. Тоа што е важно е дека сум свесен и за евентуалните последици на сето тоа, но, да бидам искрен, тоа и не допира до мене.
УМЕТНИЦИТЕ САНКЦИОНИРАНИ СО МАРГИНАЛИЗАЦИЈА
Зошто сметате дека некој уметник би имал последици ако се изрази и ангажирано, ако толкува, критикува и, на крајот, создава уметност од сето тоа и, конечно, како би бил санкциониран?
– Затоа што е можно да биде стигматизиран како неподобен за “колективната свест”, “ неинтересен како автор” или дури и како непријател на државата. Тоа можеби и се случува. Се разбира, може да биде и крајно маргинализиран. Нема да добива поддршка да работи. Секогаш поддршката за создавање била минимална, односно била низ призмата на откуп на ликовни дела, и толку. Никој не поддржува ликовна продукција, како што се финансираат продукциите на балетските претстави, филмските и театарските или музичките дела. Ликовната дејност во Македонија е ставена на страна од сите други уметнички дејности. Се случува да ви побараат дело за изложба надвор од земјата на која ќе ја претставите државата, меѓутоа вие не само што не добивате хонорар за истото туку не сте добиле ни денар за продукција на тоа дело. Во другите дејности тоа е многу подобро систематизирано и поддржано и од центрите на финансирање, односно од буџетот на културата. Ликовната дејност секогаш беше и остана некако настрана. На ликовниот уметник му остануваат неговите две раце, неговото име и презиме, и да руши армиран бетонски ѕид, што е речиоси невозможмо. Но, нештата во животот се работа на избор, ако решите да го работите тоа што најдобро го знете и го сакате, тогаш бидете подготвени на тие т.н. партизански методи.
Имавте ли прецизна идеја за тоа што ќе произлезе од разговорите вклучени во документарците или, пак, истражувањата сами по себе ја обликуваа?
– Се базираше на подолго истражување, за да се формира кастинг за учество на сите овие професионалци што требаше да учествуваат во еден сериозен ликовен проект. Беше макотрпен процес, од истражување до снимање, реализација. На темата раѓање разговарам со седуммина професионалци, тие се често спротивставени во исказите, но сите феноменолошки го објаснуваат раѓањето низ призма на сопствената професија. Тие некаде се негираат и е многу интригативно.
Дали спротивставените мислења даваат конструктивен резултат?
Тоа го развива прашањето на дебата. Не смее во 21 век да не може да си го кажете ставот или за тоа да бидете казнети. Индивидуланоста е нешто неприкосновено, особено на човек што си го посветува животот на една проблематика, тој мора да биде слушнат, а тие кои имаат тесно поврзан интерес мора да се слушнат меѓу себе. Да се има мислење и ставови е основа на демократско општество, или подобро речено на сериозно општество. Треба да се држиме до системско градење на сопствениот идентитет. Не може да одберете каде ќе се родите, може во кралската палата во Англија, може во Зимбаве. Но,ако зборуваме за минимум емпирија во едно општество, минимум желба за создавање на физиономија едно општество, тогаш уметноста треба да ја даде таа физиономија, и таа уметност ќе биде на врвот на идентитетот. Немаме силна економија, индустрија ниту, пак, производство кое може да парира на другите пазари, но кога станува зборт за културен идентитет и за науката, ако се негува вистински, може да се биде на самиот врв.
ВРЕМЕ НА ВАМПИРИ БЕЗ ЕТИКА
Дали успеавте со ова концептуално истражување да направите пресек или, пак, навистина да оформите слика за тоа од што е создаден животниот век, што е смислата на битисување во нашиот македонски контекст?
– Кога се влегува во ваква приказна, навистина не знете до каков резултат ќе дојдете, буквално е еден процес на истражување во кој реално не ги знаете луѓето, освен дека се професионалци во својата област. Сите нивни искази кога влегоа во монтажа, за мене беа откритие за сознанието до кое сакав да дојдам. Поминуваа часови и ноќи за сето тоа да добие смисла, односно да ја обелодени вистината што ја посакував. Трите сегменти на трилогијата прават пресек на човековиот животен век. Сите три сегменти раскажуваат нешто интимно, но истовремено многу колективно. Раскажуваат многу интимни моменти, многу анагажирани моменти, за една средина каква што е нашата, неразвиена во многу сегменти. Значи моментот на раѓање, што е судбината и за повампирувањето. Задоволен сум од тоа што се изроди од текот на целата постапка.
Зошто го нарекувате „повампирување“, каква алузија има со општеството, која е аналогијата со вампирот?
– Еден од соговорниците вели, кога вампирите ги пресретнувале селаните кај воденците каде што мелеле жито, на пример од петте вреќи на жито, една ќе му оставеле. Дури и вампирите имале некаква етика, а денешниот естаблишмент произлезен од народот нема никаква етика, и тоа е навистина така. Никој не поднесува одговорност за злоделата, така што прашањето на нивното санкционирање е опишано во третиот дел. Друго е прашањето на вампирџиите, луѓето што се справуваат со вампирите и се борат со нив. Нивното постоење во ангажирана смисла е многу интересен социјален феномен. Реално проектот прави еден фин пресек.
Ние живееме во едно време на релативност на вредности, па дури и легитимност на зло. Што може уметноста да придонесе за враќање на некои хумани нормативи, почитта, емпатијата?
– Ние постојано зборуваме за географските граници, а не успевме да изградиме морални, етички, социјални граници во кои условно е дозволено и треба да се движиме. Ние сведочиме на ад хок вредности што некој во еден момент ги смислил и ги наметнал. Во светот има тенденција општествата да ги негуваат таа етика, еколошката свет, вредности на однесувањето, културен идентитет, кај нас тоа престана да постои, или ако воопшто имаше некакви никулци тоа беше пребрзо збришано од наметнувањето на новите вредности. Опшетството да ни понуди услови во кои ние ќе се најдеме себе си, услови кои ќе бидат исти за сите, без разлика на припадност од најширока смисла. За да се создава квалитет, треба почва, а нашата е многу сирова, едвај создаваме никулци и тие бегаат надвор.
Во сите општествени превирања, и уметниците не останаа на страна, па голем дел од нив се идолошки инволвирани во различни политички страни, па не ретко и се обвинуваат меѓусебе за различните политички убедувања
– Не се согласувам со ставовите на некои мои колеги, нивен избор е како некоја нивна идеја ќе решат да ја провлечат низ системот, да ја канализираат низ оперативен систем, бидејки пред се верувам дека такви авторитети имаат моќ да создадат или развијат систем многу посупериорен од оној кој им е наметнат а кој е многу провиден и несуштествен, систем кој нема здрава иднина. Но тоа е нивен избор секако. Системот кој го заговаратеможе да ви биде компатибилен со оној наметнатиот, општествениот, но може и да не ви е. Дали ќе успеете системот да го инфицирате со некој позитивен вирус? Ако тоа успеете, вие сте завршиле голема работа, баш како историски победник.
Разговарала: Ана Василевска
(Од кураторите)
Во Раѓање, Неневски го обработува повеќеслојно аспектот на раѓањето видено низ разновидни призми, од најбазичната биолошко-физичка – предадена во разговор со доктор гинеколог и ембриолог (и бремената со прво дете); преку духовното раѓање и соживотот со Бога – во облик на есхатолошко-филозофски аспекти на еден православен свештеник – а всушност доктор по филозофија; онтологии за филозофското и општествено-социјално „раѓање“ и созревање – во ставовите на д-р по философија, професор и аналитичар на социополитичките состојби; па сѐ до женски наративи за физиологијата на жената-мајка – успешни професионалки во своите области, чии животи се менуваат со чинот на раѓање ново битие, што ги облагородува и ги прави подобри личности (без оглед дали станува збор за едно или за повеќе деца).
Судбина, пак, третира претставници на најранливата категорија граѓани во Македонија кои се комплетно маргинализирани – Ромите, а од друга страна и малцинство со кое се поврзува зборот судбина и во позитивна и во негативна конотација. Интегрирањето и еманципацијата на Ромите кај нас зема посебен замав во последното десетлетие, особено во полето на едукацијата и инкорпорацијата во општествените сфери, но, за жал, сѐ уште само Ромите ги среќаваме да просат на улиците (без оглед на возраста). Во видеото Наневски го проблематизира овој микросвет, со цел индиректно да критикува во два правци – и општеството што не се грижи доволно, но и решението на оваа заедница да се задоволи со стереотипите и да не се освести дека решението за судбината е во сечии индивидуални раце. Визуелно, ова видео е ослободено од колорит, т.е. е црно-бело, а во него е вклучена авторска музика, шумење од замрзнати видеофрејмови со ефект на снег, како и звуци и кадри кои се добиени со иреверзибилно течење на одредена видеосеквенција.
Во третото видео, Ние, вампирите, Наневски се занимава со сказните и преданијата на старите народи и македонските племиња што се пренесувале од колено на колено и во кои се верувало дека постојат вампири, за да прејде дијалогот постепено во анализа на актуелното општество и во персонифицирање на актуелните проблеми во политичкиот, економскиот, социјалниот и културниот свет како дело на вампири. Давајќи му една духовита димензија на целиот видеопреглед, всушност со многу критика и автокритичност, авторот констатира дека сите ние сме вампири на денешното време и дека сите актуелни општествени малформации се случуваат благодарение на нас и се иницирани директно или индиректно од сите социјални фактори на една заедница. Еден интересен коментар на соговорникот Коста вели : „…вампирите четири вреќи ќе ти земат, ама една ќе ти остават, значи имале некаква етика…“, за разлика од „современите вампири“, кои немаат етика, а уште помалку морал и скрупули.
Видеата имаат и забавен елемент бидејќи играат на тенка линија помеѓу пренагласена сериозност-ангажираност и духовитост, продлабочени размисли наспроти модули кои имаат многу плитка животна философија итн. Наневски визуелно ја обликува личната перцепција за анатомијата на животот, т.е. за конструктивните аспекти на животот (како во скулптура) приоѓајќи им како на скелетон кој бара статичност и издржаност.
Видеата имаат и забавен елемент бидејќи играат на тенка линија помеѓу пренагласена сериозност-ангажираност и духовитост, продлабочени размисли наспроти модули кои имаат многу плитка животна филозофија итн. Наневски визуелно ја обликува личната перцепција за анатомијата на животот, т.е. за конструктивните аспекти на животот (како во скулптура) приоѓајќи им како на скелетон кој бара статичност и издржаност.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.