Daily news
Град Скопје: Ќе реконструираме над 48.000 квадратни метри зеленило
Екипите на Град Скопје и на ЈП „Паркови и зеленило“ ги продолжуваат активностите за зазеленување на градот и деновиве подигаат и реконструираат повеќе зелени површини на 14 локации.
Од Градот имформираат дека на булеварот Видое Смилевски – Бато, во близина на „Рамстор“, се реконструира неуредена тревна јавна површина од 2.410 квадратни метри, на која се поставува хидрантска мрежа од 230 метри, а хортикултурно се уредува и страничното зеленило на улицата Втора македонска бригада на потегот од раскрсницата со улицата Кемал Сејфула до кружниот тек. Додаваат дека во овој дел се работи на површина од 3.020 квадратни метри, каде што ќе се постави хидрантска мрежа во должина од 1.300 метри, како и систем капка по капка во должина од 6.400 метри.
„Нова парковска површина деновиве се подига на улицата Македонско-косовска бригада на површина од 3.920 квадратни метри, со поставување хидрантска мрежа од 450 метри и систем за наводнување со 57 прскалки. Деновиве хортикултурно се уредува и страничното зеленило на булеварот Христијан Тодоровски – Карпош на површина од 1.700 квадратни метри. Во зеленилото се поставува хидрантска мрежа од 800 метри и систем за полевање капка по капка во должина од 3.000 метри. Нов лик набргу ќе добие и страничното зеленило на булеварот Србија, на потегот од сервисот „Скендеровски“ до улицата Христо Татарчев на површина од 1.600 квадратни метри, со поставување хидрантска мрежа од 200 метри и систем за полевање со 22 прскалки“, соопшти прес-службата на Град Скопје.
Екипите на Град Скопје и на „Паркови и зеленило“ работат и на уредување на зелениот плоштад меѓу булеварот Борис Трајковски и улицата Народни херои на површина од 4.500 квадратни метри, со поставување хидрантска мрежа од 800 метри и систем за полевање со 70 прскалки.
„Во Градскиот парк, пак, се работи на две локации: спроти хотелот „Канет“ и езерцето кај стадионот опфатена е површина од 4.400 квадратни метри, која се реконструира бидејќи постојната тревна површина е пред 40 години и е со надмината физиолошка старост, како и површината пред фонтаната „Лотосов цвет“ и влезот во Градскиот парк на површина од 1.900 квадратни метри. На овој дел ќе се засадат 200 украсни грмушки, перени и листопадни садници со кои ќе се дополни постојниот дрворед. Ќе се постави и нова хидрантска мрежа од 700 метри, ќе се заменат расипаните прскалки и ќе се постават нови 70“, соопшти Град Скопје.
Меѓу локациите што ќе се уредуваат се и јавната површина меѓу булеварот Гоце Делчев и улицата Лазар Личеновски, паркот зад објектот на МКЦ, јавнатата површина над надвозникот за Црниче до Основното училиште „Браќа Рибар“, улицата Самоилова.
Зелен плоштад ќе се гради и на булеварот Митрополит Теодосиј Гологанов спроти студентскиот дом „Гоце Делчев“ , а нови јавни зелени површини ќе се подигнат и меѓу улицата Јордан Мијалков и улицата Павел Шатев.
Вкупната површина што хортикултурно ќе се уреди и реконструира е 48.664 квадратни метри за што Градот Скопје ќе вложи околу 38,1 милиони денари.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.