Daily news
Грешки што ги правиме при појадокот, а влијаат врз нашето здравје и изглед
Идеалниот појадок се состои од намирници богати со протеини и прехрамбени влакна кои ни даваат енергија за почеток на работниот ден.
Избегнуваме протеини
Кремасто кафе и колаче како мафин се чест избор ако првиот утрински оброк го јадеме од на нозе, надвор од домот. Станува збор за фина комбинација за очите и желудникот на која, за жал, и недостасуваат протеини. Истражувањата покажале дека појадокот базиран на протеини ја урамнотежува количината на шеќер во крвта и ги намалува наглите напади на глад. Обидете се да го започнете денот со тврдо варени јајца и јаболко, или јогурт во кој сте додале чиа семе.
Претеруваме со сок
Овошниот сок може да биде одличен извор на витамини и минерали, но не е алтернатива на конзумирањето на овошје. За споредба, еден просечен портокал има околу 60 калории, додека чаша сок од истото овошје има речиси двојно повеќе. Притоа треба да се знае дека на сокот му недостасуваат хранливите влакна, кои изобилуваат во природното овошје.
Познато е дека на телото му требаат масти за да може нормално да функционира. Но, тоа не значи дека треба да се претерува со нив, а особено ако станува збор за заситени масни киселини како путер или сланина. Познатата њујоршка нутриционистка Бони Туб-Дикс предлага правилна дистрибуција на мастите, па за појадок препорачува комбинација на здрави масти како грчки јогурт со малку сецкани ореви.
Ако првиот оброк во денот го јадеме дури после неколку часа од будењето, односно кога ќе ве потсети ’гребењето’ на желудникот, поголеми се шансите дека ќе претераме со конзумација на храна и ќе завршиме со некоја ’калорична бомба’ во рацете. Иако не постои официјален распоред кога би требало да го изедеме првиот оброк во денот, треба да внимаваме да не се прегладнуваме.Не внимаваме на големината на храната
Верувале или не, големината на намирниците влијае и на количината на храната која ја внесуваме во организмот. Студија од Универзитетот Пен Стејт покажала дека луѓето јадат и до 18 калории повеќе по оброк кога конзумираат пченкарни снегулки со помала форма. Главната причина за тоа е што ја мериме посакуваната количина со „приближна“ метода. Наместо тоа, користете кујнска вага и изедете точно онолку храна колку што му е потребна на вашиот организам.
Јадеме многу обилни оброци
Прескокнувањето на појадокот има негативно влијание врз организмот исто како и премногу обилниот оброк. Големите количини на храна го оптоваруваат телото, го успоруваат метаболизмот и ќе ве успијат. Наместо тоа, треба да бирате оброци составени од балансиран однос на протеини и јаглени хидрати кои ни даваат доволно енергија за почеток на работниот ден.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.