Daily news
Давитков: Мора да се подготвиме и за некошаркарски игри на Косово
Кошаркарската репрезентација в среда ќе го почне настапот во претквалификациите за Светското првенство во 2019 година. Противници на Македонија се Косово и Естонија, а првиот меч избраниците на селекторот Јорданчо Давитков ќе го одиграат в среда на Косово.
По 40 дена подготовки македонските кошаркари на 2 август ќе стартуваат во претквалификациите за Мундијалот во 2019 година. Првиот противник е Косово, селекција во која се издвојуваат Бериша, Кастрати и Морина.
„Подготвени сме и имаме голема желба да да го постигнеме она што сите го сакаме, а тоа е пласман во квалификациите за СП. Мечот со Косово е прв, но според мене, не е најзначајниот, најважено на 16 август кога го играме последниот меч во Естонија да имаме пласман во квалификавциите“, рече на прес-конференцијата селекторот Давитков.
Предводникот на Македонија информира дека за првиот меч нема да може да смета на повредените Крстевски и Стајиќ, не заборавајќи да потенцира дека очекува „пеколна“ атмосфера.
„Свесни сме под каков притисок ќе бидеме. Ќе мора да се прилагодиме и на атмосферата и на судискиот критеруим. Косово не е репрезентација која поседува некој врвен квалитет, но исто така не е ниту селекција која треба да се потцени и се опасни на домашен терен. Најважно за нас е да ја повториме играта во одбраната од трите средби во Скопје. Мора да бидем мирни, да бидеме фокусирани на натпреварот, мислам дека дефанзивни тие не поседуваат квалитет со кој можат да ги спречат нашите шутери“, рече селекторот.
Тешко гостување очекува и капитенот на националниот тим, Војдан Стојановски, кој поради полесна повреда го пропушти последниот контролен меч со Бугарија.
„Ние сме подготвени и физички и психички, ќе дадеме сè од себе за да ги минеме претквалификациите. Верувам дека имаме квалитет против Косово да одиграме квалитетен натпревар и да победиме“, рече Стојановски.
Инаку, селекторот и капитенот ја искористија прес-конференцијата за да ги повикаат навивачите да ја исполнат арената „Борис Трајковски“ на мечевите кога во Скопје ќе гостуваат Естонија и Косово.
„Да не дозволиме на мечот со Естонија, а потоа и против Косово, да се чувствуваме како да играме на гостински терен“, рече Давитков.
Натпреварот Косово-Македонија ќе се одигра в среда, во Приштина со почеток во 20:15 часот. н.ц.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.