Daily news
Дали и понатаму го загревате моторот на автомобилот во место?
Зимското загревање на автомобилот пред поаѓање, е вообичаен ритуал за многу возачи, но од технички аспект кај многу современи возила, тоа е непотребно. И не само тоа, загревањето на моторот во место кога температурите на воздухот се многу ниски може дури и да штети на вашиот автомобил, објави Б92.
Кога температурите се спуштаат под нулата, како што е случај во последните денови, често во утринските часови се слуша звук на мотори од автомобили кои работат во лер. Експертите наведуваат дека се работи за стара навика која датира од времето кога сите автомобили имаа мотори со карбуратори. Тогаш загревањето на ниски температури на воздухот пред поаѓање на возилото имало смисла.
Денес сите понови модели имаат електронско вбризгување на горивото. Сензорите ја мерат надворешната температура и системот ја прилагодува работата, па се смета дека доволно е моторот да работи само 30 до 60 секунди пред да појде возилото. Потоа може да се почне со возење, бидејќи моторот побрзо ќе достигне работна температура ако возилото е во движење, отколку тој и понатаму да работи во лер.
Кога го загревате моторот во лер во тек на студени денови, не само што непотребно го трошите горивото, туку од одредени компоненти на моторот се пере маслото кое ги подмачкува подвижните делови и спречува нивно оштетување. Имено, бензинските мотори се движат на мешавина од воздух и распрнати честички на гориво кое испарува. Поради ниските температури во текот на зимата, бензинот побавно испарува, па автомобилот автоматски го компензира неговиот недостиг со вбризгување на повеќе гориво во мешавината.
Една од карактеристиките на бензинот е дека е добар растворувач, што доведува до тоа да го пере моторното масло од ѕидовите на цилиндерот на моторот, ако автомобилот во зима го загревате подолг период.
Навиката да го загреваме моторот на автомобилот во место датира од времето пред 80-тите години од 20 век и употребата на карбуратори. Потоа, наместо карбуратори, почнаа да се користат системи на електронско вбризгување на горивото, така да загревањето стана непотребно, па дури и штетно.
Инаку, покрај бучавата од звукот на моторот кој работи во лер, а која ќе ги вознемири вашите соседи, за животната средина многу се по опасни издувните гасови кои автомобилот ги испушта во тек на продолжена работа на моторот во место.
Постои уште една важна причина зошто го загреваме автомобилот пред да почне да се вози. Во текот на зимата попријатно ни е да седнеме во топла кабина отколку да се смрзнуваме во тек на возењето додека автомобилот не се загрее. Иако периодот потребен за загревање на патничката кабина кај современите возила е пократок од порано, а некои модели имаат и грејачи на седиштата, многу луѓе и понатаму возат постари автомобили кои побавно се затоплуваат.
Сепак, имајте на ум дека непотребната работа на вашиот автомобил во лер директно влијае на квалитетот на воздухот кој го дишете и дека е подобро малку да истрпите студ, отколку дополнително да го загадувате воздухот кој и така е со лош квалитет.
Што се однесува до замаглените и замрзнати стакла на возилото, секогаш можете прво да употребите магична крпа и стругач за мраз, пред доволно да се загрее воздухот од вентилациониот отвор и да ја доврши работата./крај/мф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.