Daily news
Дамјан Стојановски: Во МЗТ сум како дома
Дамјан Стојановски зад себе остави тешка сезона, која во целост ја пропушти поради повреда. Репрезентативецот на Македонија успешно заздрави од повредата, пред две недели потпиша нов договор со МЗТ Скопје Аеродром и со нетрпение го очекува стартот на новата сезона.
Дамјан Стојановски во интервју за интернет страницата на МЗТ говори за сезоната што ја пропушти поради повреда, за очекувањата во наредното првенство, претквалификациите кои ќе ги игра македонската репрезентација.
„Една сезона не бев под договор, но се чувствувам како воопшто да не сум заминал од ’Јане Сандански’. Едноставно, тука сум како дома со оглед што одамна немам настапувано за друг клуб освен за МЗТ Скопје Аеродром. Периодот го искористив да се вратам по незгодата што ме снајде на средбата со Велика Британија во дресот на македонската репрезентација. Најтешкиот дел по повредата е зад мене. Рехабилитацијата минува одлично, засега сѐ е како што треба и сигурен сум дека ќе бидам максимално подготвен за стартот на новата сезона“, вели Стојановски.
Репрезентативец очекува тешка сезона, а му се допаѓаат најавите на управата на клубот за формирање костур на тимот од македонски кошаркари.
„Пред нас е напорна сезона во која нѐ очекуваат многу тешки натпревари поради што е потребно добро да се подготвиме. АБА-лигата ќе биде исклучително силна, најмногу поради намалувањето на бројот на екипи што ќе учествуваат, со што ќе се вжешти битката како за врвот така и за дното од табелата. Без разлика што сѐ уште сме далеку од комплетирањето на тимот, мислам дека ќе имам состав кој ќе може да им парира на противниците од регионот и дека со малку повеќе среќа ќе имаме подобар настап во однос на минатата сезона. Ми се допаѓа интенцијата носители во тимот да бидат домашни играчи, што е добро како за МЗТ Скопје Аеродром така и за македонската кошарка воопшто“, дополнува бекот-шутер.
За Дамјан нема дилеми, нападот на двата домашни трофеи е приоритет за МЗТ Скопје Аеродром во новата сезона.
„Освојување на титулата и враќањето на пехарот од Купот на Македонија дефинитивно се нашите приоритети за следната сезона, а кои се надевам дека ќе успееме да ги оствариме. Во првенството мора да почнеме силно уште од самиот старт и да покажеме дека немаме намера да се откажеме од доминацијата. Купот, пак, е специфично натпреварување во кое се можни изненадувања, за што МЗТ Скопје Аеродром е најдобар пример. Но, сигурен сум дека екипата во целост ќе ги проучи слабостите од годинешниот завршен турнир во Кавадарци и дека ќе го вратиме победничкиот пехар онаму каде што му е местото, во витрините на нашиот клуб“, објаснува повратникот во сино-белиот дрес.
Стојановски нема да биде дел од репрезентацијата на Македонија летово во дуелите од претквалификациите за СП 2019 поради рехабилитацијата од повредата, но најавува дека ќе биде најбучниот навивач на своите репрезентативни колеги меѓу кои е и неговиот брат-близнак, Војдан.
„Косово и Естонија се селекции кои треба да се сфатат максимално сериозно. Денеска едноставно нема лесни противници на европската кошаркарска сцена. Најдобар пример за ланските квалификации за ЕП кои се надевавме дека лесно ќе ги поминеме, но на крајот завршивме полошо и од најцрните очекувани сценарија. Само со максимален пристап и огромна желба може да стигнеме до посакуваното, а тоа е минување на претвалификациското сито. Тешко ми е што не можам да им помогнам на соиграчите, повредата не ми дозволува да настапам, но ќе им стискам палци на моите репрезентативни другари со ветување дека ќе бидам најгласен навивач во нивниот обид да се мине овој сериозен предизвик“, завршува Стојановски.
Еден од тројцата браќа од кошаркарското семејство Стојановски во таборот на МЗТ Скопје првпат дојде до 2012 година, а претходно има играно за АМАК-СП, Вардар осигурување и бугарски Лукоил Академик. Во својата ризница трофеи досега има четири шампионски титули во Македонија и две во Бугарија, како и пет пехари во Купот на Македонија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.