Daily news
Девојка и момче вршеле кражби во семејни куќи и училишта во Скопје
Деветнаесетгодишна девојка и 18-годишно момче од Скопје добија кривични пријави поради тоа што се товарат дека во текот на минатата година извршиле повеќе кражби на територијата на град Скопје.
Имено, скопската полиција до надлежното Основно јавно обвинителство поднесе кривична пријава против 19-годишната Ј.К. и 18-годишниот Н.Ѓ. од Скопје под сомнение дека Ј.К. извршила три кривични дела, од кои две тешки кражби и едно кривично дело прикривање, а второпријавениот извршил осум кривични дела, од кои две тешки кражби, една тешка кражба на дрзок начин и пет кривични дела кражба. Како што информираат од полицијата, со извршување на овие кривични дела пријавените стекнале вкупна противправна имотна корист од 212.000 денари.
Според информациите, првото кривично дело пријавените го извршиле заедно во временскиот период од 31 март до 6 мај минатата година во куќа на улицата Ниџе Планина на тој начин што Н.Ѓ. со физичка сила насилно ја отворил влезната врата, по што двајцата влегле во куќата и украле разновиден златен накит. Украдените златни предмети Ј.К. ги продала во златарница во Старата скопска чаршија, а добиените пари ги поделиле меѓу себе.
Второто кривично дело исто така го извршиле заедно на 20 мај минатата година во куќа во село Долно Лисиче. Откако Н.Ѓ. дознал дека домаќинот со фамилијата е на семејна веселба и во куќата нема никој, заедно со Ј.К со патничко моторно возило „фиат пунто“ дошол до куќата каде што насилно ја отворил вратата и украл пари и златен накит. Украдените златни предмети првопријавената повторно ги продала во истата златарница.
Третото кривично дело Н.Ѓ. го извршил на 22 мај минатата година на булеварот Јане Сандански, на паркинг каде што со мотоцикл се приближил до една случајна минувачка и ѝ го скинал златното синџирче, меѓутоа не успеал да го земе бидејќи паднал на земјата, а во раката му останал само златниот приврзок, кој го зел со себе и подоцна заедно со Ј.К. го продал во златарницата во Старата Скопска чаршија.
Четвртото, петтото и шестото кривично дело пријавениот Н.Ѓ. ги извршил на 30 мај минатата година на улицата Васко Карангелески во основно училиште „Љубен Лапе“ на тој начин што незабележан од никого влегол во училиштето и на првиот кат дошол до училиница која била празна и од три ранци украл три мобилни телефони по што го напуштил местото на настанот.
Седмото кривично дело пријавениот Н.Ѓ. го извршил на 5 септемнври минатата година на улицата Пушкинова, повторно во основно училиште, овој пат во „Кирил Пејчиновиќ“. Тој, додека траела наставата, влегол во незаклучената канцеларија на педагогот и дефектологот и од бирото украл еден мобилен телефон, а од чантата извадил паричник и од него одзел пари по што го напуштил училиштето. Истиот ден украдениот мобилен телефон го продал на непознат купувач на Бит-пазар.
Осмото кривично дело Н.Ѓ. го извршил на 4 октомври 2017 година на булеварот Трета македонска бригада, поточно во средното училиште „Владо Тасевски“, така што влегол во училиштето и искористил шанса, додека сите биле на настава, од канцеларијата на педагогот да украде женски паричник во кој имало пари и лични документи по што го напуштил училиштето. Украдените пари ги потрошил за свои потреби, а паричникот со документите го фрлил во тревата на булеварот Србија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.