Daily news
Десетици илјади основци од Македонија, Албанија и Хрватска заедно гледаат еден филм
Холандската детска комедија „Малиот гангстер“ денеска (20 април) ќе биде прикажана во неколку десетици киносали во Македонија, Хрватска и во Албанија, синхронизирана на јазикот на земјата каде се прикажува, истовремено на Video on Demand платформата Cinesquare.net.
На денешната прес-конференција дистрибутерската куќа „Катавеј“ од Скопје, Агенцијата за филм и Медиа Програмата во Македонија, го претставија големиот меѓународен проект составен од кино и онлајн дистрибуција на детската комедија „Малиот гангстер“.
На прес-конференцијата се обратија Мими Ѓоргоска-Илиевска, директорка на Агенцијата за филм, Дејан Трајкоски, менаџер во „Катавеј“ и иницијатор на проектот и Владимир Стојчевски, раководител на МЕДИА канцеларијата во Македонија.
Проектот е финансиран од МЕДИА програмата „Креативна Европа“. Во Македонија ќе се прикажува во 22 општини (Скопје, Битола, Прилеп, Струга, Кавадарци, Крушево, Струмица, Гостивар, Куманово, Штип, Делчево, Неготино, Велес, Македонски Брод, Дебар, Крива Паланка, Тетово, Св.Николе, Радовиш, Кичево, Могила.) Во Скопје филмот ќе се прикажува во кината „Милениум“ и во „Синеплекс“.
Од денеска филмот се прикажува истовремено и на Video on Demand платформата Cinesquare.net.
Еден филм се нуди на три јазика, во три земји, во стотина киносали, на онлајн-платформа со неограничен број можности за гледање на сите електронски уреди.
Иницијатор на проектот „Катавеј онлајн и офлајн: Нови дигитални форми за филмска дистрибуција на Балканот“ е Дејан Трајкоски од „Катавеј“.
„Платформата „Синесквер“, пак, ќе почне со работа денеска и ќе биде достапна во 13 балкански земји.
– Video on Demand е еден вид видео-библиотека во која има повеќе филмови од 13 земји од ЈИЕ. Моделот на дистрибуција е особено поддржан од Еуроимаж. Среќен сум што голем дел од македонските филмови ќе бидат достапни во секој момент, со висок квалитет. За едно евро ќе може да се гледа долгометражен филм. Во иднина филмовите на Јутјуб ќе ги нема. Што се однесува на филмот „Малиот гангстер“, со задоволство информираме дека повеќе илјади деца ќе го видат во една недела“, рече Трајкоски.
ВОД платформите се карактеризирани како нова надеж и иднина на филмската промоција и прикажување и веќе се реалност во голем број земји од Европа и САД. Оваа ВОД платформа е единствената која прикажува филмови од овој дел на светот, и како проект беше препознаен од фондот „Еуроимаж“ и поддржан финансиски, по што следеше и поддршка од Агенцијата за филм на РМ.
„Освен тоа што поддржуваме филмска продукција, Агенцијата за филм поддржува и промовирање на филмската култура, како и нови начини за кинодистрибуција не само на македонски, ами и на европски филмови“, рече Ѓоргоска-Иливска.
Благодарение на овој проект филмофили од Југоисточна Европа ќе можат во секое време да ги гледаат бисерите на македонската кинематографија, како и филмови од целиот Балкан. На оваа „видео библиотека“ отсега за целата јавност во овие 13 држави се достапни за гледање во кое било легендарните филмови како „Македонска крвава свадба“, „Мис Стон“, „Солунските атентатори“, но и дел од поновата македонска кинематофрафија како „Тетовирање“, „Панкот не е мртов“, „Ова не е американски филм“ како и кратки и документарни филмови. За почеток, сите филмови имаат англиски превод, а дел се преведени и на јазици од земјите од Југоисточна Европа. крај/мф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.