Daily news
Десет причини поради кои мажите ги оставаат жените
Сакаше да го промениш
На почетокот ти се допаѓаше се на него. А потоа со тек на времето си открила дека би можел да го промени однесувањето на маса, дека почесто треба да се бричи, дека половина работи во шкафот му се погрешени… Додека ти се обидуваш да го смениш, тој ќе те замени тебе со некоја друга, која нема да бара промени кај него.
Често те боли глава
Ова можеби е најголема грешка која жената може да ја направи во врската или во бракот, да одбива секс.
ОК, понекогаш навистина ќе те заболи глава, но тие чести мигрени од ништо предизвикани нема кај него да предизвикаат жалење, туку нагон да побара жена од посилен материјал. Градници, подвезици, високи потпетици во кревет… не се резервирани само за првите месеци од врската. Обновете ја колекцијата, изненадете го во автомобилот… за да не ве изненади тој вас и тоа непријатно.
Го знаеш како својот џеб
Ако е така, тој брзо ќе излезе од тој тесен простор кој го притиска. Мажите ги сакаат своите ѕидови и не се труди да ги урнеш. Пушти го, доброволно ќе ги руши со темпо кое најмногу му одговара. Не брзај, така ќе ти биде поинтересно и на тебе.
Ожени ме
Долга врска е релативен поим. За некои тоа се шест месеци, за некои се шест години. Ако сакаш брак и деца, мора внимателно да балансираш меѓу своите намери и неговиот страв дека бурмата на раката ќе го стега и околу вратот. Ако немаш трпение, оди сама. Нема да го добиеш она што си го барала, но ќе добиеш празен простор за некој нов маж кој го сака истото што и ти.
Тој секогаш е во право
Убаво е што имаш такт и што си подготвена на компромис, но кога ќе дојде до искри меѓу вас двајца, кажи што ти пречи. Достоинството е најпривлечно од сите особини.
Секогаш си достапна
Тоа значи и дека си потенцијално досадна. Мажите се ловци, а помил е тој плен до кој тешко се доаѓа. Ако ти не спаѓаш во таквите, бргу ќе те откачи меѓу останатите трофеи и ќе појде во нов поход…
Ти не си таа вистинската
Не се само жените оптимистички суштества. И мажите сакаат да носат розеви очила на почетокот на врската. Кога ќе ги симне, не можеш да му ги вратиш со сила. Не, не. Главата горе и продолжи понатаму.
Ти загорел ручекот
Нема да те остави поради еден невкусен ручек, дури ни по една година гладување. Ќе те остави тогаш кога ќе сфати дека воопшто не се трудиш околу него, а подготвувањето на храна е само еден од начините на некого да му покажеш колку го сакаш. Мажите тоа никогаш нема да го признаат, но тие сакаат некој да се грижи за нив, нежно и внимателно, исто како мајка. Значи, пеглата во раце, или барем собери ги кошулите и однеси ги на хемиско чистење.
Љубоморна си
Ти кажува за новата супер колешка, за сосетката од приземјето, о… Да, твојот аларм за љубомора има причина да се вклучи, но не и да ѕвони без прекин. Куче кое лае не каса, освен ако му ја земеш коската.
Приговараш
Приговарањето потешко му паѓа од тоа ако си потрошила половина плата на нови чевли. Затоа, оди во шопинг наместо да му забележуваш зошто не направил ова или она и што наравил вака наместо така…
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.