Daily news
Димитров оствари повеќе средби на Генералното собрание на ОН во Њујорк
На 19 септември 2017 година со обраќање на генералниот секретар на Обединетите нации, Антонио Гутереш, беше отворена генералната дебата на 72. сесија на Генералното собрание на ОН на тема „Фокусирање кон луѓето: стремејќи се кон мирен и достоинствен живот за сите на една одржлива планета“.
На отворањето присуствуваше шефот на делегацијата на Република Македонија, премиерот Зоран Заев, придружуван и од министерот за надворешни работи, Никола Димитров.
Првиот ден на маргините од генералната дебата Димитров оствари низа одвоени, пријателски и продуктивни билатерални средби, и тоа со: заменик-министерот за надворешни работи на Мексико, Карлос де Гонзалес Иказа, со министерката за надворешни работи на Канада, Кристија Фриланд, министерот за надворешни работи на Украина, Павло Климкин, и министерката за надворешни работи на Индонезија, Ретно Марсуди.
Со соговорникот од Мексико беа разменети мислења за позначајните случувања од актуелната меѓународна политика и состојбите во американскиот и европскиот регион. Стана збор и за билатералната соработка меѓу двете земји за која беше констатирано дека постои простор за натамошен развој, меѓу другото, и во областа визна либерализација, а воедно беше упатена покана до министерот Димитров за посета на Мексико.
На средбата со хомологот од Канада се разговараше за новата страница во домашната и надворешната политика на Македонија по тешката политичка криза во земјата. Од нејзина страна беше изразен интерес и за состојбите во регионот, како и за новиот позитивен пристап на Македонија во односите со соседите. Министерот Фриланд искажа целосно разбирање и поддршка за демократските аспирации на земјата и нејзините амбиции за што побрзо приклучување кон клубот на НАТО каде што Канада има исклучително активна улога, а истовремено и изразен интерес за поддршка на демократски аспирации и развој.
Со министерот на Украина се разговараше за состојбите во регионот, унапредување на билатералната соработка, пред сè, на економски план, како и преку натамошно уредување на договорната состојба, при што беше упатена покана до министерот Димитров за посета на Украина.
Пријателската атмосфера продолжи и на средбата со првата жена министер за надворешни работи на Индонезија. Кога беше заеднички потврдено дека нема отворени или спорни прашања меѓу двете земји, министрите се согласија дека има потреба од натамошно унапредување на билатералната соработка преку посета на министерско ниво од страна на Димитров и потпишување повеќе билатерални договори.
Воедно, министерот оствари и повеќе куси видувања и разговори со други високи меѓународни претставници, меѓу кои и со високата претставничка за надворешна политика и безбедност на ЕУ, Федерика Могерини, комесарот за европска соседска политика и за проширување, Јоханес Хан, и министерот за надворешни работи на Австралија, Џули Бишоп.
Димитров присуствуваше и на неколку настани на високо ниво во рамките на ООН, меѓу кои и панел-дискусијата на темата: „Бегалци и мигранти: Идеи и најдобри практики помеѓу соработката за развој и потребата за безбедност“, каде што домаќин беше Анџелино Алфано, министерот за надворешни работи на Италија. Исто така, го придружуваше премиерот Заев на Самитот за глобалниот договор за животна средина во организација на претседателот на Франција, Емануел Макрон, како и на панел-сесијата организирана од иницијативата „Отворено владино партнерство“, каде што се обрати и Заев. Димитров присуствуваше и на прием во организација на претседателот на Европскиот совет, Доналд Туск.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.