Daily news
Димовски: Ако сакавме да го блокираме Собранието, ќе поднесевме 350.000 амандмани, а не 35.000
Пратеникот од редовите на ВМРО-ДПМНЕ, Илија Димовски, на брифинг во Собранието вели дека доколку Џафери ги повлече амандманите и не ги разгледува парламентот, тој нема да го применува законот и надвор од законската процедура. За разлика од Џафери, вели дека амандманите што ВМРО-ДПМНЕ ги поднела се поврзани со забелешките на Иванов. Според информациите, некои од амандманите на Илија Димовски се за секој пратеник од која било националност да се изразува на својот јазик.
„Не може Џафери да го оспори правото на ниту еден пратеник да поднесе амандман и Собранието да не ги разгледа. Повтореното трето читање не е оценување на уставноста. Но, пратениците имаат право да укажат дали одредени решенија во законот се уставни или не. Собранието тоа го има како надлежност. Постоело и во претходните фази. Третата фаза што сега е во Собранието е целосно легитимна, а основ се укажувањата на претседателот Иванов“, вели Илија Димовски, кој апелира до Џафери да размислува во правец да обезбеди нормално функционирање на Собранието.
Според Димовски, пратеничката група на ВМРО-ДПМНЕ нема намера да ја запре дискусијата што се однесува на јазиците. Пратеникот вели дека ова сè уште не е закон, туку предлог-закон бидејќи не е објавен во „Службен весник“.
„Поднесувањето 35.000 илјади амандмани е со цел да ја разбуди свеста кај Владата дека за овие прашања треба да се постигне општествен консензус. Тие треба да разговараат со професори правници и албанолози, да ги слушнат ставовите на помалите политички заедници. Постојат 10 формални начини за се дојде до решение. Но, формата не е битна, ова не треба да биде прашање на волја за да биде донесено решение. Јас не бев дел од преговорите за составување влада и не знам какво било предлог-решението што тогаш беше ставено на маса, поврзано со законот за јазиците“, додава Димовски.
Пратеникот на ВМРО-ДПМНЕ вели дека Џафери има тешка обврска во овој момент и дека нема да потклекне под, како што вели, политичката екскурзија бидејќи досега има премногу кршења на процедурите. Димовски напомена дека ако ВМРО-ДПМНЕ сакала да ја блокира работата на Собранието, ќе поднела 350 илјади амандмани, а не 35.000.
„Мислам дека по вчерашниот ден дилемата за политичка одговорност е неоснована. Самиот Џафери со прекинување на постапката за носење на законот за јазиците покажа дека сè тоа може да минимизира. Впрочем, не постои никаква опасност за блокирање на сите закони и иницијативи што ќе значат доближување на Македонија во НАТО и ЕУ“, вели Димовски.
Според него, Уставниот суд нема право, надлежност и можност да се изнесува по законот за јазиците. Димовски вели дека се чуди што СДСМ и ДУИ трчаат да седнат на маса со ВМРО-ДПМНЕ за решение за името, а не седнуваат за употребата на јазиците.
„Непринципиелно е кога СДСМ и ДУИ ќе да седнат да разговараат бидејќи политички мораат за проблемот за името, а да не седнат кога во прашање е законот за јазиците, каде што исто треба да се разговара за многу важно прашање. Ние никогаш не сме имале проблем да разговараме за ова прашање, туку имаме проблем кога власта ќе игнорира голем дел од македонската јавност“, додава Димовски.
Пратеникот Димовски тврди дека ќе требаат од 70 до 150 дена за завршување на сите амандмани во Собранието.
К. Ландов
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.