Daily news
Доделени грантовите за инклузија на Ромите во образованието
Единаесет граѓански организации од Македонија потпишаа договори за грантови за спроведување активности кои ќе придонесат за инклузивна средина за децата Роми во образовниот процес, информираат од Здружението на граѓани „Ромски Ресурсен Центар“ од Скопје и Центарот за семејно и детско згрижување (Family and Childcare Centre – KMOP) од Атина.
Секоја граѓанска организација од 9 општини во Македонија добива меѓу 2.500 и 5.000 евра за создавање инклузивна средина за децата Роми. Проектите ќе се имплементираат во времетраење од 6 до 9 месеци. Со ова ќе се зајакнат капацитетите на граѓанските организации на локално ниво.
„По завршување на проектот очекуваме граѓанските организации да работат на интегрирано решавање на проблемите на ромската заедница, особено во образованието. Клучна улога во целиот процес имаат и локалните самоуправи и националните институции со кои активно соработуваме. Целта на грантовата шема е да се зајакнат капацитетите на малите локални организации за да се оспособат за придонес кон унапредување на образовниот статус на Ромите во Македонија преку инклузија на децата Роми во образовниот систем“, истакна Себихан Демировски, програмски менаџер на Ромски Ресурсен Центар Скопје.
Од овие две граѓански организации посочуваат дека добитниците на грантовите, индикретно, преку процесот на апликација, се стекнуваат и со знаење како да аплицираат и да ги користат европските фондови, бидејќи самиот процес на аплицирање се базира на највисоките воспоставени ЕУ практики и критериуми за проектни апликациони процедури.
Александар Ванчоски од КМОП Скопје се надева дека, со нивното долгогодишно искуство и цврство партнерство со РРЦ, ќе придонесат кон решавање на овој значаен проблем со кој се соочува не само ромската заедница во Македонија, туку и целокупното македонско општество. Активностите спроведени преку оваа грантова шема имаат мултидимензионален пристап за подобрување на инклузијата на Ромите во образованите процеси.
„Грантовата шема ќе придонесе до потемелен и покреативен начин за подобрување на политиките и практиките за инклузија на децата Роми и ќе работи кон зголемување на свесноста на сите релевантни актери надлежни за креирање поинклузивни политики во образованието на локално и национално ниво. Исто така ќе овозможи и градење капацитети на граѓанските организации кои работат со ромската заедница за, во иднина, да креираат поиздржани и посеопфатни проекти и политики“, вели Ванчовски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.