Daily news
Државниот комунален инспекторат три месеци без плата, Заев не го исполни ветувањето
Државата им должи три плати на вработените во Државниот комунален инспекторат. Премерот Зоран Заев не го исполни ветувањето дадено пред Нова година дека, по празниците, Владата ќе назначи директор и ќе им бидат исплатени заостанатите плати. Тие четврти месец доаѓаат на работа без пари. Последната плата што ја зеле е онаа за септември. По изборите, кога тогашниот вршител на должност директор на Инспекторатот стана градоначалник, нема кој да ја потпише платата. Владата четврти месец не назначува нов директор, а единствен овластен потписник на платата во оваа институција е директорот.
Вработените во инспекторатот велат дека, освен тоа што немаат плата, на минимум се сведени и нивните активности, а со секој нов ден растат каматите на долговите што ги имаат.
„Истечени се регистрациите на возилата, стојат паркирани, не можеме да одиме со нив во контрола. Ги потрошивме резервите на гориво што ги имавме, истечено е осигурувањето, имаме неплатени сметки за струја, парно, ни ги исклучуваат телефоните поради неплатени сметки, секојдневно стигнуваат фактури за камати… Згора на сѐ, токму во овој период во ек на вируси и грипови ние немаме здравствено осигурување и мора да плаќаме за здравствените услуги иако сме во редовен работен однос“, велат од Комуналниот инспекторат.
Пред Нова година вработените во три државни инспекторати – Комуналниот, Пазаришниот и Градежниот, се пожалија дека два месеца немаат земено плата и најавија дека се организираат за штрајк. Тогаш премиерот Зоран Заев вети дека по празниците, меѓу Нова година и Божик, ќе бидат назначени директори на институциите, кои ќе им ги исплатат платите. Директори беа назначени на Државниот градежен инспекторат и на Државниот пазариштен инспекторат, како и на уште некои институции, но не и на Државниот комунален инспекторат.
Од Владата, исто како и пред Нова година, немаат објаснување зошто доцни назначувањето на директорите и пак велат дека набргу ќе биде назначен директор и на оваа институција.
„Поставувањето директор на Државниот комунален инспекторат одеше во пакет со другите директорски места на институции чии директори станаа советници или градоначалници. Овој Инспекторат беше изоставен, но ќе се екипира во наредниот период, а новиот директор прво што ќе го направи е потпишувањето на платата, како што тоа се случи во другите инспекторати, Градежниот и Пазаришниот, кои добија директори“, изјави владиниот портпарол Миле Бошњаковски за „Макфакс“.
Државниот комунален инспекторат, чии активности се сведени на минимум, е надлежен за инспекциски надзор над спроведувањето на законите од областа на комуналните дејности и го контролира придржувањето до законите и прописите на субјектите од комуналната сфера.
(М.И.П.)
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.