Daily news
Единаесет совети за безбедно возење во услови на дожд
Денеска од АМСМ известуваат дека на територијата на речиси целата земја се вози по влажни коловози, а на повисоките места провејува и слаб снег. Од УХМР велат дека во народните денови нè очекува посуво и постабилно време во наредните денови, но како и да е сезоната дождови е пред нас, па од Републичкиот совет за безбедност во сообраќајот имаат неколку совети како побезбедно да возите во услови на дожд.
Дождот е честа појава во есента и токму затоа РСБСП потенцира дека возењето на дожд бара огромна концентрација, внимателност и претпазливост. Искусните возачи знаат дека во услови на дожд и врнежи, дел од карактеристиките на автомобилот се менуваат кога е во прашање управливоста, забавувањето, забрзувањето и стабилноста на автомобилот.
Ова се неколку важни совети за безбедно возење во услови на дожд:
1. Доколку врнежите се обилни и улицата или патот е поплавен со вода најдобро е да се паркирате на безбедно место, да почекате и привремено да го одложите патувањето. Бидете особено претпазливи во деловите од патот каде што има подвозници, градежни работи, шахти, работа на пат, итн. и не поминувајте преку воден тек затоа што не сте во можност да ја процените соодветно неговата длабочина и неговата сила.
2. Намалете ја брзината и држете поголемо растојание затоа што влажниот коловоз го продолжува сопирачкиот пат на возилото. Бидете претпазливи и подготвени при ненадеен „аква-планинг“ односно во случај пневматиците да почнат да пролизгуваат над слојот со вода и привремено да го изгубат контактот со подлогата- коловозот, немојте да кревате паника и никако не преземајте нагли дејствија, т.е. не кочете и не свртувајте нагло туку само присебно и полека отпуштете ја педалата за гас и наведете го автомобилот во правецот на патот.
3. Во услови на дожд не е препорачливо да се користи автоматски уред за контрола на брзината – tempomat. затоа што во таква ситуација поголема е веројатноста од појава на „аква-планинг“.
4. Секогаш држете го управувачот на автомобилот со двете раце. Проверувајте го притисокот на пневматиците и длабочината на шарите и проверувајте ја исправноста на бришачите на ветробранското стакло. По потреба соодветно третирајте го ветробранското стакло за побрзо и полесно „пролизгување“ на водата од дождот и подобро видно поле за возачот.
5. Не возете блиску позади автобуси и големи камиони. Затоа што се создава прскачки млаз од нечиста вода која го нарушува видното поле на возачот.
6. Користете средни светла. На тој начин ќе го продолжите вашето видно поле, а исто така и полесно ќе бидете забележани од другите учесници во сообраќајот. Во случај на магла кога видливоста е помала од 50 метри, користете светла за магла. Во случај на замаглување на стаклото поради поголема влажност на воздухот, вклучете го греењето.
7. Во услови на дожд избегнувајте нагли дејствија, односно нагло свртување, запирање или забрзување. Едноставно, во услови на дожд треба да бидете понежни со управувачот, педалата за гас и кочниците. Навремено вклучете ги трепкачите доколку свртувате, се исклучувате од коловозот, престигнувате или преминувате во другата сообраќајна лента.
8. Во случај на вонредна ситуација (поплавени патишта, уништена инфраструктура сообраќајна незгода, итн.) прилагодете го начинот на возење со условите на патот. Следете ги сообраќајните знаци или вонредната сигнализација, како и насоките на полициските службеници.
9. Доколку дождот врне интензивно и подолго време, тоа значи дека имате потреба за повеќе одмор. Одмарајте на секои 2-3 часа возење. Возењето во услови на дожд од возачот бара многу поголема концентрација и почести паузи.
10. Во услови на дожд бидете одговорен и внимателен возач и пред се возете дефанзивно. По завршувањето на дождот проверете ја исправноста на сопирачките. Доколку сте возеле на коловоз на кои има поголеми количини на вода, дисковите за кочење веројатно се влажни и се нарушува сопирачкиот систем на возилото. По потреба, со благо и константно кочење исушете ги плочките на сопирачкиот систем.
11. Возете внимателно на местата каде што коловозот собира вода и внимавајте да не ги изводените пешаците кои се движат по тротоарот. Возачите посебно треба да имаат во предвид и да внимаваат на пешаците кои се движат со чадор затоа што чадорите го намалуваат нивното видно поле.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.