Daily news
Еднаш „изгорев“, сега се плашам од жени со бурми
Макс Вулдриџ (38) цели девет години бил во врска со омажена жена. Сега вели дека бурмата е првата работа која ја забележува на женското тело. И се колне дека никогаш повеќе нема да повтори нешто слично.
„Беше вљубена во мене. Се запознавме на забава во 2004 година. Беше русокоса и висока, имаше коса до раменици. Работеше на телевизија и беше многу секси. Ме заинтригира. Од мене беше постара две години.
Ми беше криво кога ја видов бурмата на нејзиниот прст и првото што си го помислив бепе „их, каква штета“. Сè додека не ми испрати мејл во кој ми предложи да ѝ докажам дека знам да готвам, и тоа во нејзиниот стан.
Прво отидовме на пијалок. Бев неодлучен. Има син од осум години, тоа ми помина низ глава. Но, после првиот бакнеж во мојата глава сè престана. Делуваше како она клише – дама на улица, а ѓавол во кревет. Се гледавме во станот на нејзините родители, кој претежно беше празен. Бевме вистинска двојка. Знаев каков кафе сака, ми спиеше на градите. Изгледаше толку лесно само да заборавам дека после тие неколку украдени денови таа му се враќа на својот сопруг.
„Те молам, извади ја бурмата кога се гледаш со мене“, ја замолив. Веднаш го направи тоа. Другите работи не беа толку лесни. Во аферата не постои спонтаност. Гледањата ни беа испланирани со недели однапред.
Во еден момент ја прашав дали сè уште спие со сопругот. „Се шегуваш? Луѓето во брак немаат секс“, ми одговори. Тоа и сакав да го слушнам бидејќи не сакав да ја делам со типот со кој беше омажена 12 години. Девет години бев со неа, а не ги запознав нејзините пријатели. Бев тајна.
Сè плаќавме во готово за да нема траги на картичката. Планирањето беше многу напорно. Знаев дека заслужувам повеќе од тоа. Дека сум ѝ верен на неверна жена. А, после девет години љубов ме напушти, и тоа со зборовите „запознав некој друг“. За малку ќе изгубев свест. После тоа веќе не ми се јави.
После толку години поминати заедно не познавам ниеден нејзин пријател за да го прашам како е. До раскинувањето поминаа три години, ми беше потребно многу време за да се опоравам. И понатаму не ми е сеедно кога ќе слушнам за неа. И себеси си ветив нешто – сакам да шетам со некоја во недела, да бидеме заедно за Нова година, да не се грижам кога да ѝ се јавам.
Инаку, два месеци откако ме остави го пронајдов мејлот од нејзиниот сопруг. Му испратив порака да видам дали тоа е навистина тој. Ми одговори дека е. Му раскажав сè, а тој никогаш повеќе не ми одговори“, ја завршува својата исповед Макс, пишува Daily Mail.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.